Кеше Парламент Мәжілісінің Төрағасы Орал Мұхамеджановтың жетекшілігімен палата бюросының кезекті отырысы өтті. Онда жалпы отырыстың күн тәртібіне ұсынылатын мәселелер қаралды, деп хабарлады Мәжілістің баспасөз қызметі.
Аграрлық мәселелер комитеті депутаттардың талқысына шаруа (фермер) қожалықтарының қызметіне қатысты заң жобасын бірінші оқылымда талқыға салуды ұсынды. Экономикалық реформа және өңірлік даму комитетінің ұсынысы бойынша “Мемлекеттік мүлік туралы” және осы заң жобасына орай бірқатар заңдарға түзетулер енгізуді көздейтін заң жобасының екінші оқылымда талқыға шығарылатыны мәлім болды.
Сонымен бірге, Мәжілістің жалпы отырысында Үкіметтен келіп түскен бірқатар жаңа заң жобаларына қорытынды әзірлеу уақыттары анықталатын болады. Сол секілді бюро отырысында Экология мәселелері және табиғат пайдалану комитетінің Шығыс Қазақстан облысында көшпелі отырысын (2010 жылғы 18-19 қараша) өткізу туралы мәселе қаралды.