Уақытта тоқтау жоқ. Міне, облыстағы ауылшаруашылық еңбеккерлері көктемгі-жазғы қауырт жұмыстарының қорытындысы – күзгі табыстарын, қол жеткізген жетістіктерін айқындады. Сала басшылары ұйымдастырған жиында өткен мерзімде өңірде барлығы 161 млрд. теңгенің ауылшаруашылық өнімдері өндірілгені ортаға салынды. Сондай-ақ жыл басынан бері экономиканың негізгі саласына 5,4 млрд.теңге инвестиция тартылып, бірқатар құнды жобалардың тиянағы келтірілгені де сөз болды.
Мемлекеттің қолдауы нәтижесінде саладағы шаруа қожалықтары мен өндірістік кооперативтердің жағдайлары жақсарып, биыл 1 201,3 млн.теңгеге 347 дана ауылшаруашылық техникалары алынып, мәшине-трактор паркі жаңартылса, кепілді түрде арзандатылған жанар-жағармай, тыңайтқыш алуларына көмек көрсетілген.
Халықты экологиялық таза азық-түлікпен қамтамасыз ету мақсатында 335 жылыжайдан 4,8 мың тонна өнім жиналып, тұтынушыларға ұсынылған. Қазіргі кезде тағы да 144 жылыжай салыну үстінде. Осылайша сала еңбеккерлері жылды табысты қорытындылайтыны байқалады.
Күмісжан БАЙЖАН.
Алматы облысы.