Кеше Өнер ұлттық институтының ғимаратында орналасқан баспасөз орталығында ЕҚЫҰ-ның БАҚ бостандығы мәселелері жөніндегі өкілі Дунья Миятович Шолу конференциясының сессиялары аралығындағы үзілісте жиынға арнайы келген шетелдік және қазақстандық журналистерге брифинг өткізіп, БАҚ бостандығы мәселелері жайында айтып берді.
Дунья Миятович ханымның хабардар етуінше, электронды бұқаралық ақпарат құралдарында және газет-журналдарда қызмет ететін журналистердің қауіпсіздігін қамтамасыз ету бүгінде аса өткір мәселелердің бірі болып отыр. Оларды соққыға жығу, қорқыту етек алып барады. ЕҚЫҰ сол проблемаларды шешу жолында тыңғылықты жұмыстарды қолға алуда. Бұл мәселелер Ұйымға мүше мемлекеттер үкіметтерінің назарынан тыс қалмақ емес. Интернет құралдарын елдің ұлттық қауіпсіздігіне нұқсан келтіру үшін пайдаланатындар да жиі көрініс беруде. Оған жол беруге болмайды. Бүгінгі Шолу конференциясының БАҚ бостандығы жөніндегі сессиясы жұмысында осыған байланысты мәселелер талқыланады.
Бұдан соң Дунья Миятович журналистер тарапынан қойылған сұрақтарға жауап қайтарды. “Дейли телеграф” агенттігінің өкілі Рахат Әлиевтің Қазақстандағы веб-сайты неге жабылғаны туралы сұрақ қойды. Дунья Миятовичтің айтуына қарағанда, бұл мәселе жөнінде Қазақстан Үкіметіне хабарланған. Біздің өз тарапымыздан бұған қосарымыз – Рахат Әлиевті Қазақстан соты қылмыскер деп танып, оны 40 жыл мерзімге соттады. Оның веб-сайтындағы ақпараттар мен мақалалар Қазақстанның ұлттық қауіпсіздігіне нұқсан келтіреді.
Келесі сұрақ біздің еліміздегі сөз бостандығы жөнінде қойылды. Елімізде баспасөз бостандығы салтанат құрған. Мемлекеттік және тәуелсіз БАҚ-тар ақпарат таратады. Баспасөз бостандығына ешкім де шектеу қойып отырған жоқ. Дунья Миятовичтің айтуынша, бұл мәселеде проблемалар бар. Оны елдің тиісті құрылымдарымен бірлесе отырып шешуге болады.
Бұдан кейінгі сұрақ Қырғызстандағы төңкеріске байланысты қойылды. Брифинг өткізушінің сөзіне қарағанда, Қырғызстандағы саяси жағдайды бірқатар елдердің БАҚ-тары әр қырынан көрсетті. Ал қазақстандық БАҚ-тар ондағы орын алған оқиғалар мен саяси жағдайды жан-жақты ашып көрсетті. Алыпқашты әңгімелерге жол бермеді, ұстамдылық танытты.
Журналистер, сондай-ақ, “Республика” газетінің жабылуына және “Инфо” газетінің бұрынғы бас редакторы Р.Есіркеповтің сотты болуына байланысты да сұрақтар қойды. Бұл сұрақтарға да ол қысқа әрі нұсқа түрде жауап қайтарды. Оның сөзіне қарағанда ол бұл мәселелерден хабардар. Оны осы елдің тиісті мекемелері арқылы шешкен жөн. Осы жерде айта кетейік, Р.Есіркепов ұлттық қауіпсіздігімізге қатысты құпияны баспасөз бетінде жариялағаны үшін сотталған болатын. Кейбір әріптестеріміздің барлығын біле отырып, сөз бостандығын желеу ету арқылы тәуелсіз елімізге күйе жаққысы келетіндері қызық-ау, осы.