Еліміздегі ең байырғы және алғаш ашылған техникалық оқу орындарының бірі – қазіргі Қазақ-Америка университеті жанындағы Алматы байланыс колледжі білім ордасы болып қалыптасқанына бүгінгі күндері 80 жыл толып отыр. Осы аралықта отандық оқу орны Қазақстанда ғана емес, жақын және алыс шетелдерде де өз беделін бекемдей білді.
Қалыптасқан дәстүрі бар көне оқу шаңырағының мерейтойына Білім және ғылым министрлігінің, Алматы қаласы әкімдігінің, “Қазақтелеком” АҚ, “Алматытелеком” және “Қазпошта” АҚ өкілдері мен өзге де жоғары оқу орындарының өкілдері ортақтасты.
Қалай десек те, осы уақытқа дейін сан мыңдаған жоғары білікті мамандарды үздіксіз даярлап келген колледждің орны бөлек. Алматы байланыс колледжі 1930 жылы КСРО Пошта мен телеграф халық комитеті коллегиясының шешімімен №14 мектеп базасы негізінде Алматы политехникалық байланыс техникумы болып ашылды. Оқу мерзімі 3 жылға шектелген оқу орнында алғашқы түлек саны 130 адамды құрайды. Содан бері Қазақстанда 80 жыл бойы білім беріп келе жатқан оқу орны саусақпен санарлықтай.
Бастапқыда техникумның өзіндік дара оқу орны, зертханалары мен жатақханалары болмаған. Алғашқы оқытушылар да басқа оқу орындарынан келіп дәріс беріп, негізгі кәсіптік пәндерді өндірістегі мамандар жүргізген. Ұлы Отан соғысы жылдарында да техникум өз жұмысын тоқтатпай, майдан даласына ауадай қажетті байланысшылар мен халық шаруашылығы мамандарын даярлауын жалғастыра береді.
Қазір, міне, заман ахуалы өзгерді, ақпараттық технологиялар дәуірінде тыныс алып отырған жайымыз бар десек те, байланыс –мемлекеттің басты стратегиялық бағыттарының бірі болып қала бермек. Қай кезде де байланыс пен ақпараттық технологиялардың дамуы мемлекеттің бәсекеге қабілеттілігін анықтайды.
Ал Алматы Байланыс колледжі 40 мыңға жуық маман дайындап, байланыс саласын білікті қызметкерлермен қамтамасыз етумен келеді. Қазіргі таңда аталмыш колледждің түлектері байланыс саласының дамуына қомақты үлес қосып отыр. Түлектердің келесі легі ғылыми жұмыстармен айналысса, біразы өз мамандықтарының майталманы ретінде танылып, шәкірт дайындап жүргендері да бар.
Еліміздегі ең байырғы техникалық оқу орны барлық кезде студенттердің білім сапасына жоғары талап қоя отырып, өзінің қалыптасқан көне дәстүрін мақтан тұтады. Қазір колледждің техникалық базасы жақсы жабдықталған. Қазақ-Америка университетіне қарасты колледжде студенттер мемлекеттік талапқа сай оқиды және мемлекеттік дәрежеде диплом алады.
Сонымен өзінің 80 жылдық мерейтойын ауқымды түрде атап өтіп жатқан колледж таяу күндері “Қазақстан Республикасының қазіргі әлеуметтік-экономикалық жағдайда техникалық және кәсіптік білім берудің мәселелері” тақырыбында мәжіліс өткізіп, секциялар барысында байланыс саласының дамуы мен білім беру үрдісіндегі өзгерістерге қатысты мәселелерді жан-жақты талқылады.
Сондай-ақ, мерейтойы аясында аталмыш білім ордасында табан аудармай қызмет еткен, дәріс берген оқытушылар Білім және ғылым министрлігі, Алматы әкімдігі тарапынан Алғыс хаттармен, Құрмет грамоталарымен марапатталды.
Айнаш ЕСАЛИ.
Алматы.