Жалпы, бұл сайлауды өткізу – уақыт талабы. Өйткені, Елбасымыз Нұрсұлтан Әбішұлы Назарбаев халыққа алдымен өзінің «5 институттық реформасын» анықтап «100 нақты қадам» бағдарламасын жариялады. Осының барлығын жүйелеп келіп, үстіміздегі жылдың басында «Ұлт Жоспары – қазақстандық арманға бастайтын жол» атты бағдарламалық мақаласын ұсынып, бәрін де тиянақтап, көпшілікке тайға таңба басқандай етіп түсіндіріп берді. Енді тек осы үлкен де жауапты міндеттерді орындау ғана қалды. Ол үшін, яғни жаңа тапсырма мен міндеттерді орындау үшін, жаңа белестерді игеру үшін жаңаша көзқарастағы жетілген мамандар керек. Олар жаңа заманға лайық заңдарды қабылдауы тиіс. Ол заңдар болашақ іс жүргізуге ыңғайлы болуы шарт. Мұның барлығы да жоғарыда айтқан, жаңа толқын мамандардың біліктігіне байланысты.
Сол себептен де, Мәжіліс пен жергілікті мәслихаттарды қайта сайлау – дер кезіндегі қолға алынған іс шара дер едім. Қазақстанның экономикасын дамытуда, Қазақстан халқын әрі қарай өркендетуде мұның рөлі зор. Қазіргі дүниежүзілік дағдарыс орын алған кезеңде әр мемлекет тез арада әрі дер кезінде өзінің етек-жеңін жиып алып жатыр. Қазақстан халқының Елбасының айналасына жұдырықтай жұмылуын мен солай түсінемін. Қазақ айтқандай, «Бір жағадан бас шығарып, бір жеңнен қол шығаратын» кез туды.
Мұрат ЖҰРЫНОВ,
Қазақстан Республикасы Ұлттық ғылым академиясының президенті.
АЛМАТЫ.