Әлеуметтік жағынан әлсіз

198 отбасы қамқорлыққа алынды Ел іші жомарт жандарға кенде емес. Қиналған жанға қолұшын созуға дайын жандардың көбі өздері көрсеткен қамқорлықты жария еткісі келмейді. Деген­мен, жергілікті кәсіпкер Мұ­рат Сармановтың Атырау кәсіп­кер­лері әлеуметтік тұрмысы тө­мен отбасыларға көмек көрсету туралы бастамасын қызу қолда­ды. Мәселен, Атырау қалалық әкім­дігіне қарасты Дамбы ауыл­дық округінде тұратын Бибігүл Ізбасова ауылдастары, жалғыз басты ана мен мүгедекті өз қам­қорлығына алса, тағы бір жеке кәсіпкер Қанапия Мұқашева да мүмкіндігі шектеулі жанды азық-түлікпен қамтуға бекініпті. Осы округтегі Ерболат Мұсаев өз иелігіндегі «Аружан» сән салонында әлеуметтік жағдайы төмен жандарға бірнеше тегін қызмет көрсетуді, ал монша иесі Гүлжан Мұқашева бала күнінен мүмкіндігі шектелген жаннан бір жыл бойы ақы алмауды көздеп отыр. Дәл осындай қайырым­дылық танытқан кә­сіп­кер­лер өзге аудандарда да бар. Соның бір дәлелі ретінде Индер ау­данындағы Ғалымжан Нұ­ғы­­манов, Сәкен Қалиев, Ке­рімбай Сабырғалиев және Қал­қаман Ахметов сынды шаруа қожалығының жетекшілері мен кәсіпкерлер 65 мүшесі бар 15 отбасына бірінші кезекте тұтынатын азық-түлік сатып алып бергенін айтуға болады. Мұндай жомарт жандар Жылыой ауданынан да табылып отыр. Осы ауданда тұратын кәсіпкер Маға­уия Мерғалиевтің жомарттығы өзгелерге ой саларлықтай. Ол қазір Құлсары қаласында 160 орындық балабақша құрылысын жүргізіп жатыр. Кәсіпкер жігіт мектепке дейінгі бірден-бір тәрбие орны – балабақшаны мемлекетке түбегейлі тарту ету­ді ойластырып отыр. Тағы бір жылыойлық іскер жігіт Бағыт­жан Достанов өзінің туып-өскен ауы­лы – Шоқпартоғайда спорт кешенінің құрылысын аяқтады. «Геолог округінде өткен есептік жиында жергілікті кә­сіпкер Мұрат Сарманов деген азамат сөз алып, әлеуметтік әлжуаз екі отбасын өз қам­қорлығына алуға дайын екенін айтты. Қоғам «Не аламын емес, не беремін» дейтін осындай адамдарға мұқтаж. Барлық аудан әкімдеріне ауыл-аудандарда Сарманов сияқты жігіттерге ой салуды тапсырдым. Қазір Сарманов бастамасына облыстың 68 кәсіпкері қосылып, 1009 мүшесі бар әлеуметтік әлжуаз 198 отбасын қамқорлығына алды. Сондай-ақ, облыстағы 139 дүкеннен әлеуметтік сауда нүктелері ашылды. Мұқтаж жандарға азық-түлік 10-50 па­йыз аралығында жеңілдікпен сатылады. Бұл әлеуметтік сауда нүктелері 3 мыңға жуық адамға қызмет етіп отыр», деп мәлім етті облыс әкімі Бақтықожа Із­мұхамбетов. Жолдасбек ШӨПЕҒҰЛ, «Егемен Қазақстан».  Атырау облысы.