Кеше Үкімет үйінде Қазақстан Республикасы Премьер-Министрінің бірінші орынбасары Бақытжан Сағынтаев Америка-Қазақстан бизнес-ассоциациясының (USKBA) президенті Уильям Кортнимен кездесу өткізді, деп хабарлады Премьер-Министрдің баспасөз қызметі.
Кездесу барысында өндірістік және инвестициялық салалардағы ынтымақтастықты одан әрі нығайту мәселелері бойынша пікір алмасулар болды.
Бақытжан Сағынтаев республикада қолайлы инвестициялық ахуалдың жасалып отырғандығын атап көрсете келіп, АҚШ бизнесмендерін қазақстандық рынокты белсендірек игеруге шақырды.
Премьер-Министрдің бірінші орынбасары индустрияландырудың екінші сатысы шеңберіндегі жобаларды жүзеге асыру үшін америкалық компанияларды тартуға мүдделілігін білдірді.
Бақытжан Сағынтаев, сондай-ақ, АҚШ бизнесмендерін ЭКСПО-2017 халықаралық көрмесіне қатысуға шақырды. Оның өзі «жасыл технологияларды» дамытуға қосымша серпін беріп, озық тәжірибелерді кеңінен көрсетуге мүмкіндік туғызбақ және энергетикалық тиімді бағдарламаларды ілгерілетуге ықпал етпек.