Құнарлы жер иесін тапсын

Еліміз тәуелсіздігіне ие болып, дербес мемлекет бола бастаған 1992 жылы шаруа қожалығын құрған едім. Сол кез­дің қазіргідей емес, біраз қиындықтары бар еді. Алғашында мемлекеттен 250 мың теңге субсидия алдым. Осы қаржыға 10 са­уын түйе сатып алып, шаруа­шылық жұ­мы­сын бастаған едім. Содан бергі кезеңде шаруа­шы­лықты жетіл­діру жұ­мыс­тарын жүргіз­дік. Әрине, оңай болма­ды, бірақ шын ниеті­мен ең­бектенген адам қа­шан­да табысқа жете­ті­нін дәлелдеп келеміз. Қазір біздің шаруа қожа­лы­ғымызда техникаларымыз жеткілікті, жұмыс жасайтын адамдар қатары көбейді. Махамбет ауданында сүт, шұбат, қаймақ, сүзбе және ет сататын арнайы дүкенімізді аштық. Жеке иелігімізде 600 гектар жеріміз бар. Бұған қоса 1 мың 400 гектар жер аумағын 49 жылға жалға алып отырмыз. Енді жалға алған жерімді 50 пайыздық жеңілдікпен сатып алуыма жаңа мүмкіндік ашылып отыр. Бұл мен секілді жер­дің қадірін білетін, ауыл шаруашылығы саласын дамытуды мақсат етіп, нық қадам жасаған барша шаруагерлерге қолдау деп есептеймін. Өйткені, бұл мәселе көп жылдар бойы осы салаға бар күш-қуатын жұмсаған шаруашылық иелерінің көкейінде жүргені де даусыз. Сонымен бірге, жастарды осы салаға бет бұруға ынталандыруға да септігін тигізеді. Жақында біздің шаруа қожа­лығы­мызға екі жас отбасы келіп, жұмыс жасауға ынта танытты. Олардың бұл қадамына қуандым, әрі қолдау білдіруді өзімнің парызым деп ұғындым. Бұған бөлек, Атырау агротехникалық колледжімен келісім жасап, студенттердің біздің шаруашылықта өндірістік тәжірибеден өтуіне қолдау жасап отырмын. Әрине, шаруа қожалығын басқарамын, төрт түлік малым бар. Техникалар да жеткілікті, алайда, мен соншалықты бай адам емеспін. Соған қарамастан, тұрмысы төмен екі отбасына қамқор­лық танытуды қолға алдым. Олардың малына қыс­тық пішенді дайындап беремін, қуанышы мен қиын­дығын бірге бөлісемін. Төрт түліктің өнім­дерін қолжетімді бағамен ұсынамын. Менің басты мақсатым – елімнің тыныштығы мен ынтымағы берік болуына, экономикалық өркендеуіне иненің жасуындай болса да үлесімді қосу. Ең бастысы, ата-бабадан қалған ұлан-ғайыр жеріміздің ел игілігіне қызмет еткенін қалаймын. Біздің жеріміз бос жатар болса оған қызығушылар да, қызғанып қараушылар да көбейеді. Сол себептен, ауыл шаруашылығы саласындағы құнарлы жерлердің өз иесін тапқаны жөн деп ойлаймын. Мәселен, мен енді алдағы уақытта 49 жылға жалға алған жерімді жеке иелігіме меншіктейтін болсам, сол жерге көптен ойымда жүрген жылыжай құры­лысын жүргізер едім. Сөйтіп, сапалы ауылшаруашылық өнімдерін өндіруге батыл кірісе аламын.  Жеңісбай ДОСҚАЙЫРОВ,  «Досқайыров» шаруа қожалығының жетекшісі Атырау облысы, Махамбет ауданы