Оңтүстікте Қазақстан облысына Парламент Мәжілісінің бір топ депутаты, атап айтқанда, Құдайберген Ержан, Байділдә Жылқышиев, Роман Ким, Уәлихан Қайназаров, Сәкен Қаныбеков, Фахриддин Қаратаев, Мансұрхан Махамбетов, Берік Оспанов арнайы сапармен келіп, қала, аудандарда жұртшылықпен кездесуде.
Ф.Қаратаев өзіміздің әріптес. Күні кеше өзбек тілінде шығатын «Жанубий Козогистон» газетінің бас редакторы болған азамат Сарыағаш ауданындағы «Құркелес» елді мекенінде, одан кейін Абай ауылында және Сайрам ауданындағы Қарабұлақ ауылында кездесулер өткізіп, жұртшылықпен дидарласты.
– Біздің Оңтүстік халқы – дархан, еңбекқор халық қой, – дейді Фахриддин Әбдінәбиұлы. – Кездесудегі ойларымды түйіп айтсам, негізгі әңгіме еліміздің келешегі, Елбасының «100 нақты қадам» Ұлт Жоспары бойынша мемлекеттік бағдарламалардың қалай іске асырылып жатқандығы сөз болды. Өзге де өзекті мәселелер төңірегінде ой қозғалды.
Депутат, сондай-ақ, Жер кодексіне өзгерістерге байланысты Елбасының жыл соңына дейін оған мораторий жариялауы елімізде кең қолдауға ие болғанын атап өтті. Тәуелсіздік – біздің ең басты байлығымыз, ұлттық құндылығымыз. Оны шайқалтуға, іріткі салуға ешкімнің құқысы жоқ екені айтпаса да түсінікті.
Ел ішіндегі кездесулерде халық ойы осы арнада тоғысып жатты.
Бақтияр ТАЙЖАН,
«Егемен Қазақстан»
Оңтүстік Қазақстан облысы,
Сарыағаш ауданы