Араққа сылқия тойып

өзгелерге әңгіртаяқ ойнатқан шенеунік жазасын алды Есіл ауданы прокура­ту­расының ұйғарымымен аудан­дық білім беру бөлімінің бас маманы Т.Бектасов қыз­метінен аластатылды. Мемле­кеттік қызмет этикалық кодексі­нің талаптарын өрескел бұзғаны үшін ол тиісті жазасын алды. Кіші шенеунік кешкі уақытта үйінде жұтып алғаны аздай «Түркістан» ойын-сауық орталығына келіп, өз­гелерге әңгіртаяқ ойнатқан. Қоғамдық орынға келгеннен кейін жалпыға ортақ тәртіпті сақтап, бетегеден биік, жусаннан аласа болып отырудың орнына демалушылардың берекесін кетірген. Темекі тартып, ішімдік ішуді бей-берекет жалғастырған. Орынды ескертулерге құлақ асудың орнына асау аттай ер-тоқымын бауырына ала тулап, дәмхана қызметкерлерін балағаттап, қорқытып, үркіткен. Даяшыларға дене жарақатын келтірген. А.Медведеваның бетін жаралаған. Оның шектен шыққан «еркелігіне» шыдамаған ой­ын-сауық орталығының әкім­шісі полиция өкілдерін шақыртуға мәжбүр болған. Сөйтіп қана «ақмағамбеттің» буына мастанып, айнала­сын­дағылардың әбден мазасын алған сабазды сабасына тү­сірген. Медициналық сарап­тама оның мас болғанын ай­ғақтаған. Осы факт бойынша прокуратура іс қозғап, заңсыздықтарды жою туралы аудандық әкім­дікке ұсыныс жолдаған. Про­курорлық ықпал ету актісінің қорытындысы бойынша білім бөлімі басшысының бұй­ры­ғымен Т. Бектасов қызметінен босатылған.  Бақыт РАМАЗАН,  журналист Солтүстік Қазақстан облысы, Есіл ауданы