Ақмола облысы, Аршалы ауданында 16 отбасы үйлі болды

КӨКШЕТАУ. 21 мамыр. Ақмола облысы, Аршалы ауданының орталығы - Аршалы кентінде Тәуелсіздіктің 25 жылдығын мерекелеу шеңберінде әлеуметтік жағынан мұқтаж тұрғындарға жаңа 16 пәтердің кілті  табыс етілді. Бұл туралы облыстық ішкі саясат басқармасының баспасөз қызметі дерегіне сүйенген egemen.kz тілшісі хабарлады. Осыған арналған салтанатты жиынды аудан әкімі Азамат Тайжанов ашып, қуанышты оқиғаның жай-жапсарын айтып берді. Ол берілгелі тұрған жаңа баспаналардың ендігі иелері кәмелеттік жасқа толмаған 5 жетім бала, көп балалы 2 отбасы және тұрмыстары төмен 3 семья екенін атап өтті. «Мен бүгін баспаналы болғаныма ерекше қуаныштымын. Шынымды айтсам, бұлай болады деп тіпті де ойлаған емес едім. Енді ештеңеге алаңдамай, отбасыммен бақытты ғұмыр кешеміз деген ойдамыз. Біздерге осындай қамқорлық танытып жатқан мемлекетімізге мың алғыс», - деді патронаттық отбасының тәрбиеленушісі О. Рязанов басқосуда сөйлеген сөзінде. Аршалы кентінде бой көтерген 16 пәтерлі тұрғын үйдің құрылысына бюджеттен 143 миллион теңге қаржы бөлінген. Құрылыс жұмыстарын бас мердігер ретінде «СК Гросс» ЖШС атқарған. Аудан басшыларының айтуларынша, үй барлық талаптарға сай салынған. Оның жанынан автотұрақ пен балалар алаңы жасалған. Аудан әкімі А. Тайжанов өз сөзінде Президент Нұрсұлтан Назарбаевтың баспананың тұрғындар үшін қолжетімді әрі сапалы болуын үнемі ескертіп келе жатқанын, мемлекеттік бағдарламаның арқасында қазақстандықтардың біразы жылда баспаналы болып тұратынын атап өтті. Бақберген Амалбек. Дерек: Ақмола облыстық ішкі саясат басқармасының баспасөз қызметі.