Қостанайда полицей ұрыны атпен қуып ұстады

ҚОСТАНАЙ. 23 мамыр. Қостанай ауданында бір отар қой ұрлаған ұрыны алдымен машинамен қуған полиция лейтенанты жолсыз жайылымда жүру мүмкін болмағандықтан, бақташының атын сұрап мініп қуып, ұстады. Бұл жөнінде облыстық ішкі істер департаменті баспасөз қызметіне сілтеме жасаған egemen.kz тілшісі хабарлады. Қостанай ауданы ішкі істер бөлімі қылмыстық полиция бөлімінің қызметкері Олжас Нұржанов өзінің кезекшілігінде қой ұрлаған ұрыны тап бастырмай ұстады. Ол алдымен ұрының ізімен жаяу және машинамен жүріп өтті, сосын жергілікті бақташының атын сұрап мініп, бес шақырымнан кейін 51 бас қойды айдап кетіп бара жатқан ұрыны ұстап алды. Олжас Нұржанов: «Оқиға болған Садовый ауылына  келсек, қораның аузын бұзып, тұрғынның 51 бас қойын алып кетіпті. Мен дереу қойдың ізіне түстім», – деді. Полиция алдымен жаяулап мал тұяғының ізінен қалмай 20 шақырым жер жүріп, Осинов ауылына дейін келген. Артынан қойдың иесі машинасымен жетіп, екеуі әрі қарай ізге түскен. Олар аудан орталығы Затобол поселкесіне дейін іздеп барған. Поселке сыртында мал бағып жүрген бақташы бір көк күртеше киген жігіттің көп қой айдап бара жатқанын көргенін, оның кеткен бағытын да сілтеген. Сосын жолсыз жайылымда машинамен жүру мүмкін болмайтындықтан полицей бақташының атын сұрап мінген. Бес шақырымдай жүргеннен кейін күдікті мен қой отары алдынан шыққан. Күдікті полицейді көріп, қаша жөнелген. Бірақ ол құтыла алмады. Бір қызығы, Олжас Нұржанов атқа өмірінде бірінші рет мініпті. Ол ұрыны аудандық  ішкі істер бөліміне алып келген. Күдікті бұрын сотталған, Новоселов ауылының тұрғыны екен. Жұмыссыз ұрлаған қойын сатып, ақша табуды ойлапты. Қазір оның үстінен Қылмыстық кодексінің «Ұрлық» бабы бойынша қылмыстық іс қозғалды, сотқа дейінгі тергеу жұмыстары басталды. Нәзира Жәрімбетова. Дерек, фото: Қостанай облыстық ішкі істер департаментінің баспасөз қызметі.