Apple жаңа iPhone смартфонының бағасын арзандатпақшы

АСТАНА. 24 мамыр. Әйгілі Apple компаниясының басшысы Тим Кук жаңа iPhone бағасының арзан болатынын айтты. Бұл туралы cnews.ru сайтына сілтеме жасаған egemen.kz тілшісі хабарлады. Үндістанның NDTV телеарнасына берген сұхбатында ол аталған телефонның АҚШ-тан басқа елдерде қымбат екенін мойындады. Салық пен төлемдердің көптігінен осындай қадамға баруға мәжбүр болғандарын, ал алдағы уақытта осы олқылықтың орнын толтыру үшін қолдан келгеннің бәрін жасайтынын мәлімдеді. Мәліметтер бойынша, АҚШ-та Iphone 6S бағасы 600 доллар көлемінде. Ал Қазақстанда теңгеге шаққанда 300 мың теңгеге жуық. Компания 2015-2016 қаржы жылының I тоқсанында рекордты деңгейде 18,4 миллиард доллар пайда тапты. Айта кетейік, осы жылдың наурыз айында Apple 4 дюймді жаңа iPhone SE смартфонын таныстырған. Сыртқы келбеті 5S формасына ұқсағанымен, функциялық жағынан 6S үлгісімен бірдей қызмет атқарады. Ал жаңа гаджет болжам бойынша қыркүйек айында таныстырылады. Аян Әбдуәли. Дерек, фото: cnews.ru.