Алып қазандық

Атырауда алғаш рет шығарылды Мұнайлы өңірдегі байырғы кәсіпорынның бірегейі саналатын «АтырауНефтеМаш» серіктестігі алғаш рет ең ауыр әрі ең ірі габаритті өнімдерді шығарды. Серіктестіктің өндіріс жөніндегі директоры Сергей Ткачуктің мәлім етуінше, елімізде дәл мұндай аса ауыр салмақтағы өнім осы кезге дейін шығарылмапты. Атырау мұнай өңдеу зауытындағы сатылы жаңғырту, нақтылай айтқанда, мұнайды терең өңдеу жобасына арналып шығарыл­ған қос қазандықтың әрқайсысы­ның ұзындығы – 37,2 метр, ішкі диаметрі – 6 метр, ал салмағы – 210 тонна. Аталған қос қазандық кәсіп­орынның өткен жылы іске қосыл­ған жаңа цехында жергілікті мамандардың темірден түйін түйетін шебер қолымен жасалды. Жаңа цехтың аумағы да үлкен, ұзындығы 144 метрді құрайды. Ені – 30 метрге, ал биіктігі 60 метрге тең. Осынау атшаптырым аумағы бар цехта алдағы уақытта бұдан да ірі габаритті өнімдер шығару жоспарланыпты. Серіктестік басшылығы КРА компаниясы іске асыратын газ-химия кешеніне қажетті 1100 тонналық ірі габаритті өнімді шығаруға келісім жасауды көздеп отыр. Қазірдің өзінде мұндай ірі өнімді жеткізу жобасы жасалыпты. Атырау мұнай өңдеу зауы­тындағы жаңғырту жобасы үшін бұдан ірі габаритті өнімді шығару жұмыстары жасалуда. Ірі дейтін себебіміз, жаңа өнімнің салмағы 440 тоннаны құрайды. Ұзындығы – 52 метр. Бұл жапондық «Мару­бени» компаниясының тапсырысымен жасалуда. Тапсырыс берушінің және бас мердігердің сұрауымен жаңа өнімнің соңғы құрастыру жұмыстары мұнай өңдеу зауытының алаңында іске асырылады. Өйткені, биіктігі 52 метрді құрайтын дүниені тікесі­нен тұрған күйінде тасымалдау мүмкін емес. – Алғашқы ірі габаритті өнім­дер шығару ойдағыдай іске асты. Шетелдік компаниялар­дың тапсырысы да, сенімі де ақталды. Біздің жергілікті мамандарымыз бұрын Еуропа елдерінде шығарылатын ірі га­баритті қазандықтар жасауды­ меңгерді. Бұл – біздің кәсіп­орын мамандарының алғашқы же­тіс­тігі. Әрине, мұндай өнімдер шығару оңай емес. Әсіресе, мамандарымыз күрделі инженерлік шешімдерді іске асыруда шебер­лік, біліктілік танытты, – дейді «АтырауНефтеМаш» ЖШС-нің өндіріс жөніндегі директоры Сергей Ткачук. Жолдасбек ШӨПЕҒҰЛ, «Егемен Қазақстан» АТЫРАУ