ШЫҰ терроризмге қарсы күресте өзінің салмақты сөзін айтуы тиіс

Ташкентте Шанхай ынтымақтастық ұйымына (ШЫҰ) мүше мемлекеттер Сыртқы істер министрлері кеңесінің отырысы өтті. Оған Қазақстан Республикасының Сыртқы істер министрі Ерлан Ыдырысов қатысты. Бұл жолғы басқосудың басты міндеті алдағы маусым айында Өзбекстан Республикасының астанасында өтетін ШЫҰ-ға мүше елдер Мемлекет басшыларының саммитіне дайындық болды. Отырыс барысында министр­лер 2015 жылы Уфа қаласында мүше мемлекеттердің басшылары қол жеткізген келісімдерді іске асыру жөнінде пікір алмасты. Уфа саммитінен кейін ШЫҰ-ның жұмысын одан әрі жетіл­діру, Ұйым шеңберінде саясат, қауіпсіздік, экономика және гума­нитарлық байланыстар сала­ларында нәтижелі іс-қимылдарды нығайту бойынша айтарлықтай жұмыс атқарылғаны туралы айтылды. Тараптар ұйымның қазіргі жағдайын және қызметінің әртүрлі бағыттардағы іс-қимылының даму болашағын, халықаралық және өңірлік істерде  оның рөлі мен орнын талқылады. Е.Ыдырысов өзінің сөзінде қазіргі жағдайларда қауіпсіздік пен тұрақтылықты қамтамасыз ету ШЫҰ кеңістігіндегі мемле­кеттердің негізгі міндеттерінің бірі болып табылатынын атап өтті.  «Дәстүрлі қауіп-қатерлердің алдын алудан басқа, әлемнің жаңа зұлымдығы – терроризм алға шығуда. Осы жаһандық қауіп-қатерге қарсы күресте ШЫҰ өзі­нің салмақты сөзін айтуы тиіс деп есептейміз», – деді қазақстандық министр. Осы орайда, ол Қазақстан Рес­пуб­ликасының Президенті Нұрсұлтан Назарбаевтың халық­аралық қатынастарда сенімді қалпына келтіруге бағытталған бірқатар негізгі бастамаларын, соның ішінде «Әлем. XXI ғасыр» манифесі бастамасын атап өтті. Е.Ыдырысов БҰҰ-ның терро­ризмге қарсы күрестегі аса маңыз­ды рөлін баса айта оты­рып, Қазақстан Президенті бас­та­машылық еткен БҰҰ терро­ризмге қарсы күрес туралы бүкіл­әлемдік конвенциясын жедел қабылдаудың және БҰҰ қол­дауымен Жаһандық терроризмге қарсы коалициясын (желі) жедел құрудың маңыздылығына назар аударды. Сонымен қатар, Е.Ыдырысов қазіргі кезеңде ұйым кеңістігінде өндіру мен қайта өңдеу, тран­зиттік-көліктік және әлеу­мет­тік инфрақұрылымдар құру ар­қылы ұзақ мерзімді сауда-экономикалық ынтымақтастықты қамтамасыз ету ШЫҰ-ға мүше мемлекеттердің күш-жігерінің негізгі векторы болуы тиіс екенін атады. «ЕАЭО, «Жібек жолының экономикалық белдеуі» атты Қытай бастамасы мен ШЫҰ арасында «көпір орнату» аса маңызды болып табылады.  Осы бағыттағы жұмыс  ШЫҰ-ның ұзақ мерзімді еуразиялық саясатты қалыптастыруға негіз болады», – деді Қазақстан Республикасының Сыртқы істер министрі. Сонымен қатар, ШЫҰ-ға мүше елдер сыртқы саясат ве­дом­ст­во­ларының басшылары Ауған­стандағы жағдайды және бейбітшілік пен тұрақтылықты қалпына келтіру бойынша шараларды талқылады, 2015 жылғы 12 ақпандағы Минск келісімдерін іске асыру негізінде Украинадағы дағдарысты, Таяу Шығыс пен Солтүстік Афри­ка­да­ғы жағдайды саяси жолмен ретке келтірудің маңызын қуаттады. Кездесудің қорытындысы бойынша 2016 жылы 23-24 маусымда Өзбекстанда өтетін оты­рыс барысында ШЫҰ-ға мүше мемлекеттердің сыртқы саясат ведомстволарының басшылары кеңесіне бекіту үшін ұсынылатын құжаттарға қатысты шешімдер, соның ішінде ШЫҰ-ға 15 жыл Ташкент декларациясы, 2025 жылға дейінгі ШЫҰ даму страте­гиясын іске асыру бойынша Іс-қимыл жоспары және өзге де құжаттар қабылданды. Отырысқа Қазақстанның, Қытайдың, Қырғызстанның, Ресейдің, Тәжікстанның және Өзбекстанның сыртқы саясат ведомстволарының басшылары, ШЫҰ-ның Бас хатшысы және ШЫҰ-ның Терроризмге қарсы өңірлік құрылымының Атқарушы комитетінің директоры қатысты. Самат МҰСА, «Егемен Қазақстан»