Ықпалдастыққа ықылас зор

Кеше Үкімет үйінде Қазақстан Республикасы Премьер-Министрінің бірінші орынбасары Бақытжан Сағынтаев Сингапур Республикасының  Мемлекеттік сауда және индустрия министрі, Мемлекеттік ұлттық  даму министрі Ко По Кунмен кездесті, деп хабарлады Премьер-Министрдің баспасөз қызметі. Тараптар Қазақстан мен Сингапур арасындағы екі­жақты қарым-қатынастардың жағдайы мен даму перс­пективаларын қарастырды. Бақытжан Сағынтаев пен Ко По Кун сауда-экономикалық және инвестициялық өзара іс-қимылдарды ұлғайту қажеттігі жөнінде ой бөлісті. Премьер-Министрдің бірінші орынбасары Қазақ­станның Сингапурдың әлеуметтік-экономикалық даму тәжірибелерін белсенді түрде өзіне бейімдеп жатқан елдердің бірі болып табылатынын атап өтті. Оның ішінде «Самұрық-Қазына» Ұлттық әл-ауқат қорын құру, мемлекеттік қызметтің жаңа моделін енгізу, электронды үкіметті дамыту және басқалар бар. Келіссөздер барысында, сондай-ақ, өнеркәсіптік ықпалдастық, инфрақұрылымдық жобалар шеңберіндегі, қаржы саласындағы өзара іс-қимылдар да талқыланды.