Қазақстан заңы жоғары халықаралық бағалауға ие болды

Жақында Женевада өткен ақпараттық қоғам мәселелері жөніндегі дүниежүзілік форумға қатысушылар еліміздің «Ақпаратқа қол жеткізу туралы» Заңын қарап, сарапшылық топ мүшелері барынша көп оң рецензиялар берді. Осы жайында Мәжіліске Халықаралық электр байланыстары одағының Бас хатшысы Хоулинь Чжао мырзаның атынан алғыс хат келіп түсті. Форумға қатысушылар Қазақстан Парламенті Мәжілісінің ел азаматтары үшін қолайлы ақпараттық орта құруға қатысты елеулі күш-жігерін ерекше атап өткен. 2015 жылғы 16 қарашада «Ашық үкімет» құру үшін заңнамалық база дайындаған «Ақпаратқа қол жеткізу туралы» Заң қабылданды. Заңның негізгі идея­сы азаматтардың ақпарат алудағы консти­туция­лық құқығын іске асыру болып табылады. Заңмен ақпарат беруге міндетті субъектілер тіз­бесі ұлғайтылды, ақпарат түрлері, оларды ұсыну тәсіл­дері жүйеге түсіріліп, кеңейтілді, мемлекеттік органдар басшыларының жыл сайынғы ашық баяндамалар жасау практикасы енгізілді. Азаматтар мен заңды тұлғалардың ақпарат алуға құқықтарын іске асыру мақсатында «Электронды үкімет» веб-порталының тиісті компоненттерінде бірыңғай модуль жасалды, ол «Ашық деректер», «Ашық НҚА», «Ашық бюджет» сияқты үш компоненттен тұрады. Жыл соңында «Мемлекеттік органдар қызметінің тиімділігін бағалау» сияқты төртінші компонентті ашу жоспарланып отыр. Тұтастай алғанда, «Ақпаратқа қол жеткізу туралы» Заң мемлекеттік органдар қызметінің ашықтығын қамтамасыз етеді, азаматтардың мемлекетті басқару­дағы құқықтары мен мүмкіндіктерін кеңейтіп, сыбайлас жемқорлықпен күресті күшейтеді.  «Егемен-ақпарат»