Тұғыры биік тұлға

Қазақстанның бүкіл өңірінде Олжас Сүлей­менов­тің 80 жылдық мерейтойы асқан сүйіспеншілікпен ата­лып өтуде. Соның бірі – Ұлт­тық музейде ұйым­дасты­рыл­ған «О. Сүлейменов поэзия­сын­дағы тарих және тағы­лым» атты ғылыми конференция. Шараға алыс және жақын шетелдерден мәртебелі қонақтар, белгілі мемлекет және қоғам қайраткерлері, қоғамдық ұйымдар­дың өкілдері, жоғары оқу орын­дарының басшылары, сонымен қатар ғалымдар мен студенттер қатысты. Конференцияда Ұлттық музей­дің директоры Дархан Мыңбай ақын Олжас Сүлейменов­тің шығармашылығы мен қаламгердің қоғамдағы орны туралы айта келіп: «Олжас Сүлейменов – біз үшін ғана емес, біздің ұрпақтарымыз үшін де мақтаныш болатын тұлға. Оның белсенділігін, қоғам үшін атқарған еңбегін ел-жұрты жақсы бағалайды. Ол Қазақстан үшін де, әлем үшін де еңбектері ең көп таралыммен шығып, көп оқылған ақын», – деді. Олжас Омарұлының жазу­шы­­лығы, қайраткерлігі, «Не­­­­ва­­­­да- Се­­мей» қозғалысының же­­тек­­­­­­шісі ре­тіндегі атқарған рөлі, ға­­лым­­­д­ы­ғы, саясаткерлігі бүгінде дүние жүзі халықтарына мәлім жайттар. «Халықаралық жиындарда, ғылыми конференцияларда, сая­сатта, поэзияда Олжастың бойы да, ойы да ешқашан аласарып көрінген емес. Ол үнемі ел мәртебесін көтерумен келеді. Олжас Сүлейменов азаматтық, адамзаттық биік поэзияны жасаушы», – деді жиында сөз алған қоғам  қайраткері Мырзатай Жолдасбеков. Ғылыми жоба аясында Олжас Омарұлының жазған мұра­ларын жаңа тың деректер негізінде зерделеу, жастарды отаншылдық пен патриотизмге тәрбиелеу, сондай-ақ қазақ мемлекеттігі­нің қалыптасуына және даму кезең­деріне қосқан үлесін ғылыми тұрғыда жүйелеу жайында ойлар айтылды. Ғылыми конференция барысында О.Сүлейменовтің шығармашылығы мен өміріне арналған фото және кітап көр­мелері арқылы ғажайып сырлар шертілді.  Қаршыға КҮЛЕН