Солтүстік Қазақстан оқушылары Мәскеуде топ жарды

ПЕТРОПАВЛ. 25 мамыр. Мәскеу қаласында «Математика және жобалау» атты 10-шы халықаралық ғылыми сайыста Қызылжар өңірінің оқушылары бірнеше жүлде иеленді. Бұл туралы білім басқармасына сілтеме жасаған egemen.kz тілшісі хабарлады. Айтулы додаға Қазақстан, Ресей, Беларусь және Болгария мемлекеттерінен келген 280 оқушы қатысып, бақ сынады. Солтүстік Қазақстаннан қатысқан 11-сынып оқушысы Мадияр Сүлеймен модельдеу бағыты бойынша жүлделі үшінші орынға ие болды. Ал 10-сынып оқушысы Алина Сақтағанова мен 11-сынып оқушысы Малика Шаяхметова алтын медальға қол жеткізді. «Білім додасында біліктілік танытқан оқушылар лицейдің ғана емес, еліміздің намысын қорғап, өздеріне артылған сенімді ақтай білді», – дейді қазақ-түрік лицей-интернатының мұғалімі Асыл Ысқақова. Өмір Есқали. Дерек: Солтүстік Қазақстан облысының білім басқармасы. Фото: pstgu.ru.