Атырау облысының әкімі Түркия бас консулымен түрікше сөйлесті

АТЫРАУ. 25 мамыр. Атырау облысының әкімі Нұрлан Ноғаев Түркияның Ақтау қаласындағы бас консулы Корхан Кенгюрюды қабылдады. Кездесу барысында әкім қонақпен түрік тілінде әңгімелесті. Бұл туралы egemen.kz тілшісі хабарлады. Кездесуде Атырау облысы мен Түркия Республикасы арасындағы қарым-қатынастың дамуы мен одан әрі өрбуі сөз болды. Облыс әкімі Нұрлан Ноғаев Қазақстан тәуелсіздік алған жылдан бері екі елдің сауда-экономикалық саласында іскерлік қарым-қатынастың орнағанына, осы орайда, Атырау облысы шетелдік инвесторлар үшін қолайлы аймаққа айналғанына тоқталды. Аймақтың инвестициялық тартымдылығының белгісі ретінде жалпы ауданы 3,5 гектар болатын «Ұлттық индустриялық мұнай-химиялық технопаркін» айтуға болады. Бұл нысанның мақсаты – инфрақұрылымдық нысандарды салу, іске қосу, химиялық, мұнай-химиялық және аралас өндірістерді дамыту. Қазіргі таңда арнайы экономикалық аймақта 14 қатысушы тіркелген. Биылғы жылдың бірінші тоқсанында өңірдің сыртқы сауда айналымы 68,9 миллион долларды құраса, экспорт көлемі 6,4 миллион долларға тең болған. Статистика департаментінің мәліметінше, Атырау облысында түркиялық капиталдың үлесі бар 21 компания тіркелген. Кездесу кезінде бас консулдың аудармашысы әкімнің қазақша сөзін түрік тіліне аударса, қонақтың сөзін түрік тілінен орыс тіліне аударып отырды. Осы кезде облыс әкімі  Нұрлан Ноғаев бас консулмен түрік тілінде сөйлесе бастады. «Мен білетін түріктердің бәрі қазақтар сөйлегенде байырғы түрік тілін естігендей боласың дейтін. Себебі, қазақ тілі ежелгі түрік тіліне өте ұқсас» – деді Нұрлан Ноғаев. Әкімнің осы сөзінен кейін шетелдік мейманның сөзін орысшаға аударып отырған тілмәш мемлекеттік тілде түсіндіре жөнелді. «Өте дұрыс айтасыз. Қазақ тілі расымен ежелгі түрік тіліне ұқсайды, – деді бас консул Корхан Кенгюрю – Қазақстанның батысы біз үшін Қазақстанның қақпасы болып есептеледі. Қазақ жері түрік халқы үшін қасиетті жер саналады. Біз екі бауырлас ел арасындағы қарым-қатынасты нығайтуға мүдделіміз». Жолдасбек Шөпеғұл. Дерек: egemen.kz. Фото: Рахым Қойлыбаев.