Ілгерілеу қамтамасыз етіліп, реформалар жалғастырылады

Елбасы Нұрсұлтан Назарбаев Халықаралық консультативтік кеңес мүшелерімен кездесті, деп хабарлады Президенттің баспасөз қызметі. Кездесуге кеңес төрағасы, Австрия­ның бұрынғы Федералдық канцлері А.Гузенбауэр, Польшаның бұрынғы президенті А.Квасьневски, Еуропалық комиссияның бұрынғы төрағасы, Ита­лия­ның бұрынғы премьер-министрі Р.Проди, Израильдің бұрынғы премьер-министрі Э.Барак қатысты. Кездесуге қатысушылар Қазақстан экономикасының негізгі даму бағытын, мемлекеттік бағдарламалардың жүзеге асырылу барысын, сондай-ақ, Еуроодақ елдерімен ынтымақтастықты нығайту үшін қабылданып жатқан шараларды, Дүниежүзілік сауда ұйымына мүшеліктің артықшылықтарын пайдалану мәселелерін талқылады. Қазақстан Президенті әлемдік эконо­ми­­ка­дағы құбылмалылыққа, оның біздің елге де әсер етіп отырғанына назар аударды. – Жаһандық экономика өсімі болжанған көрсеткіштерден төмен болып шықты. Бұған қоса, әлем қандай бағытта жылжып бара жатқаны, оны қысқа және ұзақ мерзімді кезеңде не күтіп тұрғаны туралы көңілге қоным­ды сарапшылық пікір жоқ. Қазір Еуропада, Ресей мен Қытайда күрделі үдеріс­тер жүріп жатыр. Осының бәрі бола­шақ жаһандық даму тұрғысынан көп ой-пікір  тудырады. Сонымен қатар, біздің ел аталған қиындықтарға қарамастан, бұдан әрі ілгерілеуді қамтамасыз ете отырып, өз реформаларын жүзеге асыруын жалғастыруда, – деді Мемлекет басшысы. Кеңес мүшелері кездесу үшін алғыс айтып, жаһандық күн тәртібінде тұр­ған өзекті саяси және экономикалық мәсе­ле­лерге қатысты пікірлерін ортаға салды. Атап айтқанда, Австрияның бұрынғы Федералдық канцлері А.Гузенбауэр Қазақстан жүзеге асырып жатқан реформалар жаңа жаһандық сын-қатерлерге уақтылы берілген жауап екенін және олар біздің республикамызға мейлінше дамыған елдер клубынан орын алуға мүмкіндік беретінін атап өтті. Израильдің бұрынғы премьер-министрі Э.Барак отандық агроөнеркәсіп кешенін дамыту мәселелеріне тоқталды. Ол Қазақстанның әлемдік азық-түлік нарығында бәсекеге қабілетті орынды иеленуі үшін қажетті барлық ресурсқа ие екенін мәлімдеді. Польшаның бұрынғы президенті А.Квасьневски әлеуметтік мәселелерді шешуге, адам капиталын жетілдіруге, шағын және орта кәсіпорындарды қолдауға бағытталған реформалардың арқасында елдің жүйелі дамып келе жатқанын атап өтті. Еуропалық комис­сияның бұрынғы төрағасы әрі Ита­лия­ның бұрынғы премьер-министрі Р.Проди Еуразиялық экономикалық одақ пен Еуропалық одақтың арасындағы қарым-қатынастың даму әлеуеті зор екеніне, ол барлық тарапқа, соның ішінде Қазақстанға пайда әкеле алатынына назар аударды.