Мақсат – бір, міндет – ортақ

Ақордада Мемлекеттік хатшы Гүлшара Әбдіқалықова БҰҰ Бас хатшысының көмекшісі, Еуропа мен ТМД елдері үшін БҰҰ Даму бағдарламасының аймақтық бюросының басшысы Ж.Сұлтаноғлумен кездесті. Тараптар Қазақстан мен БҰҰ-ның елдік командасының 2016-2020 жылдарға арналған Серіктестіктің негіздемелік бағдарламасын іске асыру аясындағы Қазақстан мен БҰҰ ДБ ынтымақтастығының келешегі жөнінде пікір алмасты. Г.Әбдіқалықова өзінің сөзінде «Қазақстан-2050» Стратегиясындағы, «Нұрлы Жол» мемлекеттік бағдар­лама­сындағы, «100 нақты қадам» Ұлт Жоспарындағы негізгі бағыт­тар БҰҰ-ның Тұрақты даму мақ­саттарымен және БҰҰ Бас хат­шы­сы­ның бесжылдық іс-қимыл жасау бағдарламасының мақсат­тары­мен үндесетінін атап өтті. Сон­дай-ақ, ол БҰҰ ДБ серіктес­тікті ын­ты­­мақтастықтың барлық бағытын­да – бірлесіп қаржыландырыла­­тын жоба­­лар аясында, Астанадағы мем­лекет­­тік қызмет істері өңірлік ха­бын одан әрі ілгерілету бағытын­да жалғас­ты­ру­ға мүдделілік бар екенін білдірді. «БҰҰ мен Қазақстан арасындағы ынтымақтастық жыл өткен сайын жаңа әрі жоғары сатыға көтеріліп келеді. Біз БҰҰ Бас хатшысы Пан Ги Мун мырзаның 2015 жылы Астанаға жасаған сапарын жоғары бағалаймыз. Сонымен қатар, біз БҰҰ бас­­­шылығы мен ұйым агент­тіктері жетекшілерін Астана эко­но­­микалық форумын өткізуге қолдау көрсеткендері үшін риза­­­шылығымызды білдіреміз. Сіз­дердің бұл форумға жыл са­йынғы қатысуларыңыз оның жұ­мысына үлкен маңыз береді», – деді Мемлекеттік хатшы. Сонымен қатар, Г.Әбді­қалы­қова Қазақстан Прези­денті­нің былтырғы жылы БҰҰ Бас Ас­самблеясының 70-ші мерей­той­лық сессиясына қатысып, он­да бірқатар маңызды ұсыныс­тар жаса­ғанын, соның бірі 2045 жылға дейінгі Стратегия­лық бастамалар жоспары екенін айтты. «Президент Н.Назарбаев АҚШ-тағы жаһандық саммитте «Әлем. ХХІ ғасыр» манифесін жариялап, ол БҰҰ Бас Ассамб­лея­сы тарапынан ресми құжат ретін­де қабылданған болатын. Стра­тегиялық бастамалар жоспары мен манифест бір-бірімен тығыз бай­ланысты. Бұл екі бастама да қақтығыс жағдайларын бол­дырмауға, бүкіл дүниежүзінде бейбітшілікті орнатуға бағытталып отыр», – деді Г.Әбдіқалықова. Мемлекеттік хатшы Қазақстанның БҰҰ-мен көптеген бағыт бойын­ша әріптестік байланыс орнатқа­нын, оның ішінде гендерлік сая­сат мәселесіне қатысты да үл­кен жұ­мыс­тар жүргізіліп жатқанын айтып өтті. «Біздің алдымызда үлкен мақсат-міндеттер тұр. Демек, біз олардың әрқайсысы бойынша әріптестік орнатуға дайынбыз», – деді Мемлекеттік хатшы. Кездесу соңында Г.Әбді­қалықова БҰҰ Бас хатшы­сының көмекшісі Ж.Сұлтаноғлуға тығыз ынтымақтастық үшін алғыс білдіріп, табыс тіледі. Журналистерге берген сұх­батында Ж.Сұлтаноғлу өзінің Қазақстанға осымен 4-ші мәрте келіп отырғанын тілге тиек ете келе, биылғы сапар Астана эко­но­микалық форумымен бай­ланысты екенін жеткізді. «Қазақстанның Мемлекеттік хатшысы бізге әрдайым қолдау көрсетіп, өзара әріптестік орнатып келеміз. Сол себепті, біз алдағы уақытта да ынтымақтастығымызды дамытып, жаңа мақсаттарға қол жет­кізу жолдарын бірлесе қарас­тыруымыз керек», – деді БҰҰ өкілі. Ләйла ЕДІЛҚЫЗЫ, «Егемен Қазақстан»