Балабақшадан... «бал жалаған»

Қазақта «Бал ұстаған бар­мағын жалайды» деген сөз бар. Бірақ бюджеттің азын-аулақ қаржысына қарап отырған балалар бақшасын «балды мекен» деп айта алмасақ керек. Дегенмен, сол болар-болмас қаржының өзі­нен қымқырып қалуды ар көр­мейтін ағайындар болады екен. Қызылорда облысы, Сыр­дария ауданының прокуратура қызметкерлері Н.Ілиясов ауы­лындағы «Балдырған» ба­лалар бақшасының бюджет қаржысын жаратудағы әре­кеттеріне тексеру жасағанда, суық қолдардың қимылы бар екені бірден анық­талып шы­ға келді. Құқық қорғау ор­ган­­дарының өкілдері мұнда бюд­жеттің 2 052 786 теңге қар­­жы­сының көлденең қалтаға тү­сіп кет­кенін анықтады. Сондықтан «Балдырған» балаба­қшасы мемлекеттік ком­муналдық қазыналық кәсі­пор­нының лауазымды тұл­ғаларының әрекетінде Қылмыстық ко­декстің 189-ба­бы, 3-бөлігінің 2-тар­мағында көзделген қыл­мыс белгілері бар деп табылып, аудандық прокуратура тиіс­ті құжаттарды сотқа дейінгі тергеп-тексерудің бірыңғай тізі­ліміне тіркеді. Ал аудандық соттың үкімімен балабақшаның бұрынғы меңге­рушісі А.Айдарбековаға бас бос­тан­дығын 5 жылға шектеу, есеп­шісі Б.Келісоваға 3 жылға шартты түрде сотталу жазалары кесілді.   Мұрат АЙТҚОЖА