Ұлттық рухтан нәр береді

IV халықаралық «KADEX-2016» қару-жарақ пен әскери техника көрмесінің басталуына санаулы күндер қалды. Көрсетілетін техника көрме өткізілетін орынға шоғырлана бастайды. Ал ұйымдастырушылар келушілер мен қатысушылар үшін соңғы жұмыстарды жүргізіп жатыр. «KADEX-2016» көрмесіне келу­шілер қорғаныс өнеркәсібінің көрсетілетін объектілерін өз көзімен көріп, ерекше әсер алып қана қоймай, көрмені ұйымдастырушылар дайындаған шараларға көңілдері толып, бір марқайып қалары анық. Қоғамдық тамақтануды ұйымдас­тыру үшін көрмеге қатысушылар мен келушілер үшін ұлттық стиль­дегі 10 киіз үй тігіледі. Екі киіз үйде ұлттық кәдесыйлар сатылады, бі­реуінде қазақ тұрмысының дәстүрі мен мәдениетін, қалған жетеуінде ұлттық ас мәзірі, яғни қазы-қарта, қымыз, шұбат, көже, сондай-ақ, өзге елдердің тағамдары сатылымға шыға­рылады. Тағам бағалары нарық бағасына қарағанда қолжетімді болады. Мұны ұйымдастырушылар айтып отыр. Бір күнде 1500-2000 адамға қызмет көрсетіледі деп күтілуде екен. Одан басқа, меймандар үшін ұлттық және еуропалық ас мә­зірі бар «Лагуна» екі палаткалы мей­рамханасы ашық болатын кө­рінеді. Және бір айта өтерлігі – таза ауада отырып тамақтануға да мүмкіндік жасалмақшы екен. Ұйымдастырушылар, сондай-ақ көрмеге қатысушылар мен қонақ­тарға үш жерде фастфуды және салқындатылған сусындары бар, тез тамақтану палаткалары мен павильондар қызмет көрсететінін жеткізді. Қоғамдық тамақтану орындары көрме басталған сәттен бастап соңғы клиентке дейін ашық болатыны да атап өтілді. IV халықаралық «KADEX-2016» қару-жарақ пен әскери техникалар көрмесі қорғаныс саласындағы ауқымды іс-шаралардың біріне айналып отыр. Ол қорғаныс өнеркәсібі саласы мамандарының ғана емес, сонымен бірге, бұқаралық-медианың да назарын аудартуда. Көрмеден әлемнің көптеген елінен 300-ден аса бұқаралық ақпарат құралдарының өкілдері ақпарат тарататын болады. Сәулебек БІРЖАН