Кореяның екі алтын, екі күміс жүлдесі

Шорт-трек Шорт-тректен Оңтүстік Ко­рея­ның құрамасы әлемдегі азулы командалардың бірі. Мәселен, Ка­наданың Ванкувер қаласында өткен Қысқы Олимпия ойын­дарында сегіз алтынның алтауын бірдей қоржынға салған корея­лық­тар айды аспанға шығарып, алғашқы ондыққа енген. Енді, міне, Астананың «Алау» коньки тебу кешенінде өтіп жатқан шорт-тректен Азия ойын­дарын­да корейлер жарыстың бірінші күні-ақ екі алтын, екі күмісті жеңіп алды. 1500 метрлік қашықтықта Шо Ха Ре алтыннан алқа тақса, тағы бір жерлесі Парк Сейхун күмісті иеленді. Ал Жапониядан келген желаяқ Сакакива Вазуко үшінші орынға табан тіреді. Бұл қашықтықта қазақстан­дық Айдар Бекжанов, Нұрберген Жұ­ма­ға­зиев, қыздар арасында қостанайлық Д.Волокитина мұз айдынына шыққан бо­ла­тын. Айдар Бек­­жанов «Б» тобында өнер көрсетіп, жетінші орынды иеленсе, қос­танайлық қы­зымыз да а­л­ғашқы ондық­қа ілінді. Шорт-трек спорты біз­дің елімізде, әсі­ресе, Орал қаласында соңғы кездері алға жылжи бастады. Мәдіғали Қарсыбековтің шәкірті Артур Сұлтанғалиев 500 метрлік қа­шықтықта жарыс жолына шық­са, тағы бір Оралдың қызы Ксения Мотова екінші ондықтан көрінді. – 500 метрде Олимпиада чем­пионы Ли Ху аса қауіпті қарсылас, тіп­ті медальға іліге алмасам да алғашқы алтылыққа енсем деген ойым бар, – дейді болашағынан үміт кү­тетін шорт-трек ше­бері Артур Сұл­тан­ғалиев. Жарыс жеңімпаздарын Азия­ның Шығыс аймағы бойынша Олимпиялық кеңесінің вице-президенті Фок Тимоти және Оңтүстік Кореяның Спорт және мәдениет министрі Жинг Буинг Кук, Астана мен Алматыдағы Азиаданы өткізу жөніндегі бас дирекциясының бас директоры Анатөлі Құлназаров тапсырды. Оңдасын ЕЛУБАЙ.