Бір отбасын қылмыскерлерден құтқарған полицей марапатталды

ҚОСТАНАЙ. 7 маусым. Қостанайдың Таран ауданының Береговое селосында бір үйлі жанды қаскөйдің қылмыстық әрекетінен ажыратып алған учаскелік инспектор, полиция капитаны Ерлан Таңжарықов «Ерлігі үшін» медалімен марапатталды. Бұл туралы облыстық ішкі істер департаменті баспасөз қызметіне сілтеме жасаған egemen.kz тілшісі хабарлады. Оқиға үстіміздегі жылдың 29 ақпаны күні орын алды. Сол күні ер адамы жоқ ылғи әйелдер тұратын отбасына қарақшылық шабуыл жасаған бұзақыны оқиға үстінде ұстап, ауылдастарын өлімнен құтқарып қалды. Бұған дейін хабарлағанымыздай, ол дәл сол күні өлім мен өмірдің ортасында жатқан балықшы мен оның әйелін де ажал тырнағынан аман алған еді. Жақында Қазақстан Республикасының Президенті Нұрсұлтан Назарбаев учаскелік инспекторы Ерлан Таңжарықовты «Ерлігі үшін» медалімен марапаттау туралы Жарлыққа қол қойды. Оны облыстық ішкі істер департаментінің бастығы, полиция полковнигі Бекет Аймағамбетов иесіне табыс етті. Нәзира Жәрімбетова. Дерек, фото: Қостанай облыстық ішкі істер департаменті баспасөз қызметі.