Қытайда ескі автобустар қонақ үйге айналды

АСТАНА. 7 маусым. Қытайдың Шаньси провинциясының әкімшілік орталығы Тайюань қаласының туристік аймағында ондаған ескі автобустар қонақ үйлерге айналды. Бұл туралы ekd.me сайтына сілтеме жасаған egemen.kz тілшісі хабарлады. Ерекше қонақ үй кешені осы жылдың басында ашылды. «Қолданыстан шығып қалған автобустарды сатып алу өте оңай. Меніңше, оны пайдаға жарата білу тамаша әдіс. Олардың әрқайсысында бөлме, қонақжай бөлме, жуынатын бөлме, сонымен қатар жылу, жарық пен сумен қамту жүйесі бар», – деді қалалық туристік ведомство қызметкері Гао Юнпин. Оның айтуынша, туристік аймақта осындай  50 автобус-бөлме бар. Ал ескі автобусты мейманханаға айналдыру үшін 9 мың доллар көлемінде қаржы кетеді екен. Осы жылдың 1 шілдесіне дейін осындайдың 200-ге жуығын ашуды мақсат етіп отыр. Ең қызығы, алдағы уақытта трактордан, жүк көліктерінен, тіпті ұшақтан жасалған қонақ бөлмелер ашылуы мүмкін. Ал мұндай нөмірде бір рет түнеу құны 200-ден 600 юаньға дейін. Бұл теңгеге шаққанда шамамен 10 мың – 30 мың теңгені құрайды. Аян Әбдуәли. Дерек, фото: inform.kz.