Кәде

Жұрт құлағы жағымды жа­ңа­лықтарға қашанда түріңкі ғой. Соның ішінде көпшілік кө­ңіліне аса қонымдысы елі­міз­дің мерейлі мерекесі құр­ме­тіне облыстағы әр қала мен аудан­ның жергілікті тұрғын­дар­ға арнап тартулар әзірлеп жатқаны жайлы хабар болып отыр. Бүгінде «Тәуелсіздіктің 20 жылдығына – 20 тарту» деген атаумен белгілі бұл бастама жылы қабылданып, ойда­ғы­дай іске асырылуына мүдде­лі­лік ерекше. Өйткені, онда көз­делгендей, біраз азамат бас­паналы бола алады, бөбектер балабақшаларды толтырады, ел­ді мекендердің көркіне көрік қосылады, көз тартарлық мә­дени ошақтар ұлғаяды. Бар­шаға тартымды осындай игілікті шараның шарапатын кө­ру­ге нұралықтар да үмітті. Ай­мақта оны алғаш көтеріп, қолға алған Астана іргесіндегі аудан ме­рекелі жылға берекелі базар­лықты молынан шашу етуді мәртебелі міндет тұтады. Ал ел ішін қуанышқа бөлер сый-сияпат аз емес. Күтілген жақ­­сы істер биыл жылдағыдан көбірек. Әлбетте әдеттегідей әуелгі сыйлық бүлдіршіндерге тар­тылады. Аудан орталығын­да­ғы қайтадан қалпына келтірілетін 95 орындық балабақша сәбилерге алдағы қыс басында құшақ аша­ды. Бұл, әсіресе, жоғары білім алып, туған ортаға оралушы жас отбасыларға шаттығы бөлек оқи­ға болғалы тұр. Бұрыннан да бар екеуіне үшіншісі қосылып, кешегі түйткіл мәселенің бұдан былай қарай екінші кезекке ысыры­луына мұмкіндік береді. Нұра өңірінің де өзіндік та­рихы қызғылықты. Сәкен Сейфуллин, Абдолла Асылбеков, Кә­рім Мыңбаев, Сәйділ Талжанов, Бүркіт Ысқақов, Қабікен Мұ­қы­шев сынды саңлақтар ізі қалған киелі топырақтың өткендегі, бү­гінгі тыныс-тіршілігінің лебі аудан­дық өлкетану мұражайынан дәл мереке алдында есе бастай­ды. Мұндай тағылымдық орынды тілеп келген жергілікті өлке­та­ну­шыларға ол тамаша тарту болмақ. Аймақтағы ең әдемі елді ме­кендердің бірі ретінде белгілі Киевка кентіндегі Тәуелсіздік ата­ла­тын бас көше көркін одан сайын көркейту көзделген. Жасыл желекке жайқалған оның бойы тұр­ғындардың сүйсіне сейілдейтін, рахаттана демалатын орынға айналады. Жас мамандар үшін салынып жатқан тұр­ғын үйлер сән түзейді. Бұрынғысынан танығысыз өз­геретін аудандық кітапхана көзге тартымды ғимарат бо­луы­мен бірге, оқырмандарды толық­қан жаңа әдебиеттермен, компьютерлер қондырылған оқу залдарымен баурайтын болады. Бұлар аудан басындағы өз­герістер саналса, бұған қоса өңір өмірі шырайын аша түсер жаңартулар және бөлек әңгі­меге татиды. Мәселен, Қара­ғанды – Есенкелді, Щербаков – Киевка көлік жолы жөнделіп, осыған дейінгі машақат жеңілдейді. Жалпы, бұл реттегі мәселені оңтайлы шешуде аудан тәжірбиесі алысқа аян. «Тәуелсіздіктің 20 жылды­ғы­на – 20 тарту» бастамасы ая­сында белгіленген «Ақбұлақ» салалық бағдарламасы ауыл тұрғындарының көп жылдан бер­гі ұсыныс-тілектерінен ту­ған­­­дығын атап айта кетпеске бол­­майды. Шалғай елді мекендерді таза ауыз сумен қамтамасыз етуге арналған ол бойынша қа­зір атқарылу үстіндегі жұмыс­тар қыруар. Жобаланып отыр­ған­дай, ауылдық жерлер 80 па­йызының сапалы нәр көзіне тұ­тынымын қанағаттандыруға ба­ғыт­талған істер мерекеге шейін тындырылады. – Біз алға қойылған іс-ша­ралардың мерзімінде жүзеге асы­рылуын басты назарда ұс­таудамыз. Аталған тартулар ішкі мүмкіндіктеріміз бен күш-қабі­летіміз егжей-тегжейлі сарапталу арқылы белгіленген. Халыққа жақсылық сыйлағаннан артық қан­дай мәртебе бар. Барымызды бар­дай қылып, жұрт игілігіне жа­ратудың басқа-басқа, биылғыдай жолы бөлек жылдағы жөні де, мәні де өзгеше. Сондықтан тәуел­сіздіктің торқалы тойына арнал­ған кәде-жоралғылардың әр са­ла­ны қамтуын әрі тартым­ды­лы­ғымен айрықша болуын таң­даған едік. Бүгіндегі қимыл-әрекеттер ойлағанымыздың оңынан оралуы­на сендіреді, – дейді аудан әкімі Серік Шайдаров. Мінеки, астығымен атақты аймақта бұл күнде осындай бас­тамашылық кеңге қанат жайып келеді. Нұралықтар үлгісі өз­ге­лерді де талпындырмай қой­мауда. Ұлытау ауданы 20 от­ба­сыға жеке отау сыйлауды ойлас­тырса, Ақадырда темір жол бекеті бейнесі ажарланады, стадион салынады. Мұндай сый-сия­паттар барлық жерде әзір­леніп жатыр. Айқын НЕСІПБАЙ. Қарағанды облысы, Нұра ауданы.