Норвегиялық серіктестермен тәжірибе алмасты

Қазақстандағы Бала құқықтары жөніндегі уәкіл Зағипа Балиева бастаған делегация Норвегия Корольдігінде сапармен жүр, деп хабарлады Қазақстан Парламенті Мәжілісінің баспасөз қызметі. Делегация құрамында Парла­мент Мәжілісінің депутаттары Светлана Бычкова, Наталья Жұма­ділдаева, орталық және жергілікті атқарушы, құқық қорғау және сот органдарының, Адам құқықтары жөніндегі уәкіл өкілдері бар. Сапар мақсаты – Қазақстан Республикасында балаларға қатысты заң жүйесін халықаралық стандарттарға сәйкес дамыту, бала құқықтарын қорғау және мониторинг жүргізу саласында, мемлекеттік органдардың Бала құқықтары жөніндегі уәкілмен өзара қарым-қатынасы, қылмыс құрбандары мен куәгерлері бол­ған балаларды қорғаудың меха­низм­дері бойынша тәжірибе алмасу. Сапардың бірінші күнінде Қазақстанның Норвегиядағы елшісі Қайрат Әбусейітовпен және Норвегиядағы Бала құқық­тары жөніндегі уәкіл Анне Линдбоуе­мен кездесулер өткізілді. Сонымен қатар, Қазақстан делегациясы Сыртқы істер, Балалар, теңдік және интеграция, Денсаулық және әлеуметтік қорғау, Білім және ғылым, Әділет министр­ліктеріне, ЮНИСЕФ-тің үйлес­тіру орталығына, Орталық Азия бюросына, Бала құқықтары жөнін­дегі үйлестіру орталығына, Пар­ламентке, Адам құқықтары жөніндегі ұлттық институтқа, Полиция жанындағы балалар үйіне, прокуратураға, Норвегияның сот басқармасына, Осло және Акерсхуса университеттік кол­леджіне барды. Сапар БҰҰ Балалар қорының (ЮНИСЕФ) қолдауымен ұйым­дастырылды.