Биатлон берендері

Солдатсайдағы биатлон ста­дионында 12,5 км. қашықтық бо­йын­ша ерлер арасындағы биатлон жарысы (ізге түсу) болып, он­да Азияның жеті елінен келген 14 спортшы бақ сынады. «Жүзден жүйрік, мыңнан тұл­пар» деген рас. Алатаудың ақ қар­лы әдемі бөктеріне серуендеу үшін емес, тек қана жеңіске жетем деген жігермен келген он төрттің арасы­нан Александр Червяков межелі қашықтықты 35:42.5 минөтте ба­ғын­дырды. Сөйтіп, ақпанның екінші жұлдызы күні қазақстандық спорт­шылардың алтын қоржынын тағы бір жоғары деңгейлі медальмен толықтырды. Сөреге екінші бо­лып жеткен жапон елінің биат­лон­шысы Нагай Джунджи екінші орынды еншілеп, күміс медальға ие болды. Үшінші орынды қытай­лық спортшы Жен Лонг қанағат тұтты. Айта кетейік, Александр Червяков – Азиада бәсекесіне Ақ­мола облысы­ның жұртшылығы үкі­леп қосқан азамат. Ал ол өзіне ар­тылған сенімді ақтады. Бәрекелді! Біз Солдатсайдағы баспасөз орталығында Қытай елінің Синьхуа ақпараттық агенттігінің өкілі Чжао Юй деген жас журналистке жолығып, елімізде өтіп жатқан Азиада туралы пікірін сұра­ғаны­мызда ол: – Азиада жақсы ұйымдас­ты­рыл­ған, кемшіліктер де жоқ дей алмай­мын, бірақ олар майда-шүйделер ғана. Тұжырып айтсам, Қазақ елінің Қысқы Азиаданы ғана емес, соны­мен бірге Олимпиада, әлем чем­пионаттары сияқ­ты мәртебелі жа­рыс­тарды да ойдағыдай ұйымдас­тыруға таби­ға­ты тұрғысынан да, экономи­ка­лық жағынан да, спорт­шы­лары­ның шеберлігі жөнінен де толық мүмкіндігі бар, – деді. – Қытай, Жапония сияқты елдер Қазақстан Азиадасына өз­дері­нің екінші, үшінші нөмірлі спортшыларын жіберді деген сөз бар. Бұл шындыққа қаншалықты жанасымды? Мысалы, бүгінгі биатлон жарысын алайық. – Қытай елі Қазақ Азиадасына бірінші нөмірлі спортшыларын ғана жіберді. Бірақ кейбір елдерде қысқы спорт түрлерінен үлкен жарыстар қатар өтіп жатқан­дық­тан ол жаққа кеткен спортшы­лары­мыз да бар. «Сырт көз сыншы». Міне, алып ел – Қытай журналисінің пікірі осындай. Көсемәлі СӘТТІБАЙҰЛЫ.