Бағдарламадағы жаңа өзгерістер

Бүгін Қарағанды облысына қарасты «Спасск» оқу-жат­­тығу орталығында «Айбын» екінші республикалық әс­кери-патриоттық жастар жиыны басталады. Оған әскери-пат­риоттық клубтардың, республикалық (облыстық) мектеп-интернаттардың тәрбиеленушілері, жоғары оқу орындарындағы әскери кафедралардың студенттері қатысады. Биылғы жылы осы іс-ша­раға алғаш рет жоғары оқу орын­дарының әскери кафедраларынан 52 қыз бала қатысады. Қазақстанның барлық аймағынан шараға 800-ден аса адам қатысады деп жоспарланып отыр. Аталған жиын барысында әскери-қолданбалы спорт түрі және жауынгерлік даярлық, әске­рилендірілген ойындар, сондай-ақ, интеллектуалдық байқаулар мен басқа да жарыстар өтеді. Биылғы жылы әскери-пат­риоттық жиынның бағдар­ла­масына жаңа өзгерістер енгізілді. Өткен жылмен салыстырған­да, әскери-спорт түрі бойынша жарыстар саны екі есеге азайды. Сондай-ақ, жас буынның зият­керлік және интеллектуалдық қабілетіне ерекше назар аударылатын болады. Сонымен қатар, қатысушылар өздерінің дене машықтарын 100% көрсетуі қажет. Әскери-патриоттық жиында «Менің роботым» байқауы бойынша әр топ робот үлгілері мен роботталған жүйенің үлгілерін, сондай-ақ, ұшу аппараттарының жобаларын көрсетеді. «Айбын» жиынына қатысушылар еліміздегі танымал тұлғалармен таныса отырып, еліміздің қалыптасуы туралы қысқа метражды фильмдер фестивалінде өз таланаттарын көрсете алады. Бұдан өзге, көрсетілім сабақ­тарында қару-жарақ, әскери тех­ника мен жабдықтар, «Арлан», «Но­мад» броньды транспор­тер­лері, командалық-штабтық маши­на­лардың жаңа үлгілері көрсетіледі.  «Егемен-ақпарат»