Егінжайдағы ерен еңбек

Оңтүстікте астық ору баста­лып кетті. Комбайндар сары алтын­дай жарқыраған алқапта кеме­дей жүзіп жүргендей әсер қалды­рады. Негізінен, астық бастыру жылдағыдан екі аптаға жуық ерте басталды. Мұндағы себеп көктем өте жаңбырлы болды да жаздың басы аптапқа ұласты. Көптеген шаруа қожалықтары мезгілсіз жауған жаңбыр дәнге толы бидай масақтарын жерге жатқызып тас­тай ма деп қауіптеніп еді. Ол енді қорқынышты емес дейді. Астық мәселесіне келсек, өңірде 198 мың гектарға масақты дақылдар егілген. Оның 156,7 мың гектары бидай, 38,3 мың гектары арпа. Комбайн жатқасы, ең алдымен, облыс орталығына іргелес Қазығұрт ауданындағы алқапқа салынды. Мұндағы 34 мың гектар жерге бидай, 3,2 мың гектарға арпа егілген болатын. «Аманкелді» ЖШС басшысы Нұрлан Құраловтың есімі республикамызға белгілі. Жүзімнің жоғары сұрыптарын өсіріп, көрші мемлекеттерге экспортқа шығарып отырған шаруашылық басшысының 1,5 мың гектар егістігіне алғашқы орақ түсті. – Мемлекеттік қолдаудың тиімділігі диқандардың өнімді еңбек етуіне жағдай туғызды, – дейді Нұрлан Амангелдіұлы. – Мәселен, бидайымыздың өткен жылға қарағанда түсім­ділігі 20 пайызға артты. Қол­дағы астықты қайда өткізе­мін дейтіндей емес, қазірге дейін 30 мың тонна дәнді көр­ші Өзбекстан мен Иран мем­лекеті сатып алуға келісім­шарт жасады. Бүгінде алқапта «Аманкелді» ЖШС-інің 15 комбайны мен 12 КамАЗ жүк көлігі жұмыс істеп жатыр. Мемлекетіміз әлемдік қар­жы дағдарысы қос өкпеден қыс­са да тауар өндірушілерге жақсы көмек беруде. Мәсе­лен, жеңілдетілген бағамен боса­тылатын минералды тыңайт­қыштардың көлемі өткен жылдағыдан айтарлықтай артқан. Алдын ала болжам бойынша 197 гектар масақты дақылдардан гектарына 22 центнерден өнім алынады деген үміт бар. Сонда Оңтүстік диқандары 430 мың тоннадай риздық дәнін жинамақ. Бақтияр ТАЙЖАН, «Егемен Қазақстан» Оңтүстік Қазақстан облысы