Сал ауруынан емдейтін құрылғы

Оралда Біржан Қожақов есімді кәсіпкер сал ауруына шалдыққандардың бойын тіктеп, сауығып кетуіне мүмкін­дік бе­ретін құрылғы жасауды қолға алды. Ол бұрын жол сақшысы болып қызмет еткен. Екі аяғын бірдей үсітіп алып, арбаға таңылған. Өмірдің қиындығына мойымаған Біржан қазіргі таңда 20 адам қызмет ететін жиһаз цехын басқарып отыр. Мүмкіндігі шектеулі жандарға арнап жасалған құрылғылар өндірістік тәсілмен шығарылып, әлеуметтік мекемелерге тегін таратылады. Акция барысында бірнеше оңалту мекемесі жаңа құрылғыларға ие болды. Осыған байланысты жергілікті құрылыс компаниясы құны 5,5 миллион теңге болатын арнайы жабдықты сыйға тартты. – Бұл аппараттар Ресей, Германия, Түркия елдерінде шығады. Сол үшін «Қазақстанда жасай аламыз» деген ак­циямен жасадық. Барлығын дәрігер­лермен кеңесіп барып, іске асырып жатырмыз, – дейді Біржан Қожақов. Темір ҚҰСАЙЫН, «Егемен Қазақстан»