Жетінші қабаттан құлаған бала аман қалды

Оқиға 21 маусым күні кешкі сағат 18.00 шамасында Ақтау қаласындағы 17 шағын аудандағы Green Park тұрғын үй кешенінде орын алды. Ақтауда соңғы жылдары салынған сәулетті үй саналатын аталмыш кешеннің жетінші қабатынан құлаған бала төменгі қабатқа арнайы салынған тордың арқасында аман қалды. Оқиға куәлерінің айтуынша, терезе алдында ойнап отырған бала кенет терезені ашып, төмен қарай құлдилай жөнелген. Абырой болғанда, жақтаулары темірден жасалғанмен тордың өзі жұмсақ материалдан болып шықты. Құтқарушылар келіп тор үстінде жылап отырған балаға көмек қолын созған. «Баланы жұбатып, оның қозғалмауын, қорықпауын сұрай жүріп Дүйсен Аққалиев баспалдақ қойып, жоғары өзі көтеріліп, баланы қолына алды», дейді тұрғындар. Жедел жәрдем көмегін күтпей-ақ, баланы дереу ауруханаға жөнелтті. Артынша Маңғыстау облыстық ауру­ханасының қабылдау бөлімі балада ауыр жарақаттардың жоқ екендігін хабарлаған. Қазір құқық қорғау орындары оқиғаның мән-жайын анықтауда. Олар ересектерден терезелерді ашық қалдырмауды, балалар бар бөлмеде терезе алдына жүк, жиһаз қоймауды, сондай-ақ балалардың терезені өз бетінше ашуына мүмкіндік бермейтін құлыптарды қондыруға кеңес беруде. Гүлайым ШЫНТЕМІРҚЫЗЫ, «Егемен Қазақстан» Маңғыстау облысы