Бақыт құшағындағы байқау

Елбасы Нұрсұлтан Назарбаевтың 2013 жылғы шеші­мімен «Мерейлі отбасы» жалпыұлттық байқауының жариялануы еліміздегі ең жарқын мерекелердің қата­рында шаттық шашуда. Өйткені, «Мерейлі отбасы» – Мәңгілік елдің тірегі». Сондықтан, Ақмола облысындағы байқаудың қорытынды кезеңі осы ұранмен өткізілуі 320 адам қатыс­қан тәлім шараның салтанатын аша түскені анық. – Мемлекет басшысы атап өткендей, отбасы – Қазақстан қоғамының тірегі, ел жетістіктерінің негізі, – деді облыс әкімінің орынбасары Нұрлан Нұркенов құттықтау сөзінде. – Отбасылық құндылықтарды, отбасы мен неке­ні және көп балалы болу өнегелерін кеңінен дәріптеу, хал­қымыздың ұлық мұраттарының бірі. Мұндай өнегелі отбасылар біздің өңірімізде де көптеп саналады. Жыл санап байқауға қатысушылардың саны артып келеді. Бүгін біз таңдаулыларды анықтап, қуаныштарына ортақтасамыз. Осынау қымбат дәстүріміз әманда жалғасын таба берсін. Ұйымдастыру комитетінің шешімімен Агафонов­тардың интернационалдық отбасы, мұғалімдік өтілі 407 жылды құрайтын Лошковтардың әулеті арнайы жүлдеге ие болды. Ал үшінші орынды 11 бала тәрбиелеп, шаңырақ құрғандарына 60 жыл толуын тойлап отырған Айтқожиндер мен Қорғалжын еліне аты кеңінен танымал Смановтардың ынтымақты ұясы жеңіп алды. Жарқайың ауданынан келген Рахима Сұлтанова апаға «Достық» мәдениет сарайына жиналған қауым түрегеп тұрып құрмет көрсетті. «Батыр Ана» 49 жасында жесір қалғанымен, тіршілік ауыртпалығына қайыспай, 25 немере, жеті шөбере сүйіп отыр. Сондай-ақ, жастығына қарамастан, өздерінің үш баласы мен екі немересін өсіріп, бұған қоса, үш баланы асырап алған Зеренді ауданының тұрғындары Сайран мен Гүлнұр Ыбыраевтарға арналған қошемет те айрықша болды. Бұл екі отбасы жүлделі екінші орыннан көрінді. Байқаудың бас жүлдесі Сандықтау ауданының Құрметті азаматы, белгілі кәсіпкер Атлан Докаев пен Макин қаласының тұрғыны, І топтағы мүгедектігіне қарамастан 17 баланы күтімге алған Серік Әкімбаевтың отбасына бұйырды. Алдағы қыркүйек айында осы отбасылардың біреуі республикалық байқауға қатысатын болады. Шара соңында бүлдіршін Дәулетхан Әлинұрдың тұсауы кесіліп, мерекелік концерт қойылды. Бақберген АМАЛБЕК, «Егемен Қазақстан» Ақмола облысы