Астана күніне орай «Ашық есік күндері» өтеді

Астана күніне орай елордадағы Қазақстан Республикасының Тұңғыш Президенті – Елбасының кітапханасында «Ашық есік күндерінің» онкүндігі өтеді. Тәуелсіздігіміздің 25 жылдығы мен Астана қаласының 18 жылдығын айшықты атап өту мақсатымен ұйымдастырылып жатқан бағдарламада 5 көрме залы болады. Мұндай мәліметтер Елбасы кітапханасының атқарушы директоры  Бейсембай Жұмабеков пен Геосаясат және аймақтық зерттеу­лер қызметінің жетекшісі Ержан Сал­тыбаев және Жұртшылықпен байланыс қызметінің жетекшісі Оксана Лоскутованың қатысуымен өткен Орталық коммуникациялар қызметіндегі брифинг барысында айтылды. Кітапхана директорының айтуынша, қызметкерлер «Ашық есік күні» айдарымен он күн бойы қала тұрғындары мен қонақтарының назарына бес бағыт бойынша арнайы көрме залын жабдықтаған. «Атап айтқанда, фотодеректі мұ­рағат көрмесіне Мемлекет басшы­сының өмірі мен қызметі арқау етілген. «Елбасы әлемі: Тұлға. Сая­саткер. Жасампаз» көр­ме­сі­нің авторлары Қазақстан Рес­пуб­­ликасының Тұңғыш Прези­ден­тін – Елбасын тұлға, әлемдік дең­гейдегі саясаткер, елдің қоғам­дық-саяси және әлеуметтік-эко­но­микалық өміріндегі көрегенді және жасампаз өзгерістердің бастамашысы, жетекшісі және қатысушысы ретінде сипаттайтын түпнұсқалық тарихи құжаттарды ұсынады. Ал «Естелікке қолтаңба» көрмесі шетел мемлекеттері басшыларының, танымал тұлғалардың Елбасының атына сыйға ұсынған суреттерімен ерекшеленеді. Сонымен қатар, экспозицияда бірегей 40 фотоқұжат қамтылған», дейді Б. Жұмабеков. Мамандар пікіріне сүйенсек, қалған үш көрме Астана тақы­ры­бына арналған. «Астана бола­шағы – балалар көзімен» тақыры­бындағы көрмеде ұлттық мәде­ниеттің даму тарихына арналған бал­ғын­дардың суреттері паш етіледі. Жасөспірімдердің шебер­лігін шыңдау мақсатында Сурет­шілер одағының мүшесі Аман­жол Мусалимов пен Әлішер Бес­палиновтің арнайы дәрісін  ұйым­дастыру да жоспарланған. Ал «Еу­разия жүрегінде» атты фотокөрмеде Журналистер одағының мүшесі Александр Пархоменконың Ас­тана қаласындағы ғажайып көрі­ністері бейнеленген 60 фотосурет жұртшылық назарына ұсынылмақ екен. Нұрлыбек ДОСЫБАЙ, «Егемен Қазақстан»