Жетісу жағдайымен танысты

Премьер-Министр Кәрім Мәсімов Алматы облысындағы әлеуметтік нысандар және инфрақұрылым құрылысын аралап көрді Кеше Премьер-Министр Кәрім Мәсімов жұмыс сапарымен Тал­дықорғанға келді. Үкі­меттік делегацияның жұ­мыс бағдарламасының ты­ғыз­­дығынан әңгіме бірден әуежай­дан басталды. Алматы облы­сы­­ның әкімі Амандық Бата­лов Талдықорған әуежайы­ның ұшып-қону алабына жүр­гі­зілген жөндеу жұмыстары жә­не оның мүм­кін­діктері туралы айтып берді. Негізінен Талдықорған әуе­жайы жылына орта есеппен 26,5 мың адамды тасымалдап, 600 әуе рейсін жасайды. Жалпы әуе жай­дың ішкі жолдары, байланыс, электр жүйесі, дабыл құралдары толығымен ауыстырылған. Сөй­тіп, қаланың кіреберісіндегі келбетін көрген соң үкіметтік делегация Талдықорғанның оңтүстік-батысында жарыса әрі көкке шаншыла сәндене бой көтерген тұрғын үй кешеніне келді. Таяу жылдары бұл арада жаңадан 400 гектар жерге бірнеше шағын аудан, әлеуметтік-мәдени құрылымдар: балабақша, мектеп, халыққа қызмет көрсету орталығы, драма театр, емхана, қонақ үй, көрме кешені салынып, қала көлемі үлкейе түсетіні де хабардар етілді. Өңір басшысының орынбасарлары Ғалымжан Әбдірайымов, Серікжан Бескемпіров, Серік Тұрдалиевтер «Нұрлы Жол» бағдарламасы аясында жол, тұрғын үй құрылысы және «Ақбұлақ» бағдарламасы бойынша аймақты газдандыруды жеделдете дамыту барысымен Үкімет басшысын хабардар етті. Осы жерде Жетісудың аграрлы секторы, Жаркент-Қорғас агломерациясы жобасымен өндірістік алқапты, индустриялық аймақты құру жөнінде қысқаша хабарлама жасалды. Жергілікті билік өкілдерінің айтуынша жақын жылдарда Панфилов ауданы, Нұркент ауылын жаңа қалашыққа айналдыру жоспарланған. Жаңа қалашықтың инженерлік-коммуникациялық құрылыс жұмысының құны 5, 6 млрд. теңге болатыны да мәлім етілді. Жалпы Үлкен Алматы шеңберлі автокөлік жолын жүзеге асыру үшін Алматының алты көшесі түйісетін шеңберлі жол салынуы керек екен. Үкімет басшысы Талды­қор­ғанның оңтүстік-батысына таяуда ғана ашылып, «Жасыл ел» қозға­лысының облыстық штабы ор­наласқан жастарға қызмет көрсету ор­талығында болды. Ондағы интер­нет-кітапхананың жұмысын көріп, жергілікті жастармен пікір алмасып, олардың жұмысқа орналасуы секілді өзекті мәселелеріне үкіметтік делегация өкілдерін де ара­лас­тыра білді. Кәрім Мәсімов жұмыс сапарының соңында жақында ғана құрылыс жұмыстары аяқталып, көріктілігімен көз тартатын Оқушылар сарайында болды. Онда өнер саласының сан қырын ашатын көрме, ойын алаңдары орналасыпты. Мұнда балаларға арналған 50-ге жуық түрлі үйірмелер ашылып, онда жас физиктер, математиктер, биологтар, астрономдар жаттығатын болады. Жобаға сәйкес, зертханалар, фотосалондар және тағы басқа шеберханалар жабдықталады. Жүзу бассейні, сән-салтанат мектебі, бейнежазу студия­сы, тіпті балалар театры да жұмыс істейді. Ең бас­тысы жергілікті ба­ла­ларға тартылатын теңдессіз сый – жұлдыздарды ала­қан­дарына салған­дай әсерге бөленетіндігі. Ол үшін ғи­марат шатырына қуатты телес­коп орнатылады. Сол арқылы мәжіліс залы­на арнайы монитор қойы­лыпты. Мұндай ғаламат телес­копиялық құрал еліміздің бірде-бір өңірінде жоқ екен­дігін мамандар растауда. Сәнді ғимараттың кон­церттік залында Үкімет мүшелері мен облыс акти­вінің алдында облыстың әлеу­меттік-экономикалық дамуы жөнінде өңір басшысы хабарлама жасады. Үкімет басшысы бірқатар министрлерді мінбеге шығарып, Алматы об­лысына қатысты министр­­ліктерде атқарылып жатқан жұмыс­тар туралы айтқызды. Жиынды түйіндей келе бұл күні көтерілген мәселелерге тиісті тұлғалар жауабы берілетіндігін де мәлім етті. Нұрбол ӘЛДІБАЕВ, «Егемен Қазақстан» Талдықорған