Компьютерге байланған жан мүгедек бола жаздады

Қытайда өз үйінен қашып, бір апта бойы интернет клубтан шықпаған 19 жастағы жігіт мүгедек болудың аз-ақ алдында қалды. Дәрігерлердің айтуынша, ол осы уақыттың бәрінде ойын ойнап, қоз­ғалыссыз отырғандықтан, екі аяғы іріңдеп кеткен. Бірнеше күн ас ішпей, орнынан да тұрмай, компьютерге тәуелді болған бозбаланы жұрт теміржол маңайында есін білмей, құлап жатқан жерінен тауып алған. Оны көргендер тіпті, үйсіз-күйсіз жүрген қаңғыбас адам деп ойлап қалған көрінеді. Ұзақ уақыт қозғалыссыз отыру мен компью­тердің зардабы өтіп кеткендіктен, аяғындағы инфекция денеге таралып кетсе, өмірімен қош айтысуы мүмкін болар еді. Бірақ ақ халаттылар дер кезінде көмек көрсетіп үлгерген. Құмар ойынға тәуелділіктен бүгінде қайтыс болып жатқандар аз емес. Мәселен, өткен жылы дәл осы Аспанасты елінде 19 сағат бойы компью­тердің алдында телміріп отырған жасөспірім тіл тартпай кеткен. Ал Башқұртстанда 2015 жылы тамыз айының соңында 22 күн бойы үздіксіз ойын ойнаған 17 жасар бала қайтыс болды. Мәліметтерге сәйкес, ол 2014 жылдан бері компьютерге 2 мың сағат уақытын жұмсаған. Ата-анасы үйде болмаған кездері ескі әуеніне басып, тек ұйықтап алу үшін ғана үзіліс жасаған. Аян ӘБДУӘЛИ, «Егемен Қазақстан»