Google кеңсесінде тігілген киіз үй

АҚШ-тың Калифорния штатында орналасқан Google X кең­сесінде киіз үй тігілді. Бұл жаңалықты алғаш болып компания қызметкері, Қырғызстан азаматы Тілек Мамутов facebook әлеуметтік желі­сіндегі жеке парақшасында хабарлады. – Google X кеңсемізде киіз үйдің орнатылуына Эмили және Ричард есімді әріптестерім көмектесті. Оларға алғысым шексіз. Ин­­тернет арқылы бай­ла­­­­­­ныс­қанымызда өті­­­ніш-ті­­легімізді жерге қалдырмады. Ал­дағы уақытта бұл орын мей­мандармен кездесуге ар­налған бөлме ретінде пайдаланылады, – деді Тілек Мамутов. 2014 жылы Қазақстан мен Қыр­ғызстанның бір­лесуімен киіз үйді жа­сау­дың дәстүрлі мағлұматы және өнері ЮНЕСКО-ның тізіміне енген болатын. Google X қазіргі таңда Alphabet холдингінің құрамында. Негізінен перспективті технологиялар шы­ғарумен айналысады. Олардың арасында жүргізушісіз жүретін автомобиль, шынайы өмір көзілдірігі, атмосфераның стратосфера қабатында интернетке кіру, адам сөзін тануды, сонымен қатар видеодағы, ғаламтордағы нысандарды анықтайтын оқыту нейтрон желісі бар. Айта кетейік, көш­пелі халық­тардың баспанасы болған киіз үй бүгінде көпшіліктің қызы­ғу­шылығын тудыруда. Мәселен, осыдан бірнеше ай бұрын Канадада Майкл Джеффри есімді студент ықшамдылығы, үнемділігі, қо­лай­лығы үшін ежелгі жұрттар бас­панасын құрып алған.  Ал Голливуд жұл­дызы Леонардо Ди Каприо 10 күндік дема­лысын Моңғолияда киіз үйде өт­кізген. Аян ӘБДУӘЛИ, «Егемен Қазақстан»