• 06 Шілде, 2016

Мереке аясындағы мерейлі сәт

362 рет

көрсетілді

2 мин

оқу үшін

Egemen Qazaqstan

Вашингтонда Астана күні және Қазақстан мен АҚШ дипломатиялық қатынастарының 25 жылдығы атап өтілді Астана күні мерекесінің қарсаңында Вашингтон қаласында дәстүрлі қазақ тағамдарын дайындау бойынша шеберлік-сабағы өткізілді. Іс-шараға саяси және сараптамалық топтардың, «Қазақстан достары клубының» өкілдері және қазақ диаспорасы қатысты. Қазақ ұлттық тағамдары АҚШ қауымдастығының ерекше қызығушылығын тудырды. Вашингтондағы іс-шарада қонақтарға дәстүрлі қазақ мәзірінен тағам дайындау ұсынылды. Қонақтар алжапқыштарын тартып, қазақ тағамдарын дайындау әуесқойлығымен әйгілі Edlow International Company (EIC) корпорациясының басшысы Джек Эдлоутияның жасағандарын қайталады. Елшілік қызметкерлері мен диаспора өкілдері қонақтарға көмектесіп, нан илеуге қатысты. Осыдан кейін қонақтар өз қолымен жасаған тағамдарының дәмін татуға шақырылды. Қазақстанның АҚШ-тағы елшісі Қайрат Омаров мерекелік дастарқан үшін себептердің жеткілікті екенін айтты. Ол Қазақстанның БҰҰ Қауіпсіздік Кеңесінің құрамына кіргеніне ерекше тоқталып, бұл кәсіби мерекесі 2 шілдеде аталып өткен қазақстандық дипломатия тарихындағы үлкен жетістіктердің бірі екеніне назар аударды. Елші қонақтарды АҚШ-тың алдағы Тәуелсіздік күнімен құттықтап, биыл Қазақстанның тәуелсіздік алғанына 25 жыл толатынын және АҚШ-пен дипломатиялық қатынастар орнағанына да ширек ғасыр болатынын айтып өтті. Ол, сонымен қатар, 6 шілдеде аталып өтетін Астана күніне тоқталып, биыл елорда өзінің 17 жылдығын тойлайтынын көлденең тартты. Жиналғандардың назарына «Қазақстан – Ұлы Дала елі» заманауи мобильді қосымшасы ұсынылды. Елшілік қонақтары қазақ тағамдарымен жақын танысуға мүмкіндік берілгені үшін алғысын білдіріп, Қазақстан халқы мен мемлекет басшылығын тәуелсіздіктің 25 жылы ішіндегі жетістіктерімен және алдағы мерекелермен құттықтады. «Егемен-ақпарат»