Қарқаралы құшақ жайды

Еліміздің БАҚ өкілдері табиғат аясында демалып қайтты Байланыс және ақпарат қызметкерлері күні мерекесінің қарсаңында еліміздің бірқатар БАҚ өкілдері Қарағанды облысындағы тамсандырған табиғаты бар Қарқаралыда       дем­алып қайтты. Бұл игі шараны Қазақстан Республикасы Білім және ғылым министрлігі ұйымдастырған еді. Қарқаралы топырағында елі­міздің БАҚ өкілдерін бір кезде Елбасы  Нұрсұлтан Әбішұлы Назарбаев білім алған Қарағанды мемлекеттік техникалық уни­верситетінің ректоры А.Ға­за­лиев бастаған қызметкерлер қарсы алып, білім ордасының сол жердегі «Политехник» оқу-сауық­тыру орталығына орналас­тырды. ҚарМТУ ректоры журналистерге арнайы қонақасы беріп, еліміздегі білім саласында жүргізіліп жатқан жаңа реформалар туралы тұшымды әңгіме өрбітті. Журналистер қауымы дема­лыс­тың алғашқы күні Қарқа­ралыдағы Құнанбай қажы сал­дырған мешітте құран бағыштау рәсіміне қатысып, одан кейін әй­гілі «Шайтанкөлге» барып, та­би­­ғат тамашасын өз көздерімен көрді. Екі күнге ұласқан демалыс сапары барысында БАҚ өкіл­дері Мәди Бәпиұлы, Қасым Аман­жолов, Нұркен Әбдіров, Тоқтар Әубәкіров, Мартбек Мамыраев сынды ақын­дар мен батырлар шыққан киелі топырақтың тарихымен танысып, руханиятымен тыныстады.Қарқаралыдағы тарихи орындарда, атап айтқанда, Абай Құнанбайұлы екі айдан астам аялдаған көпес Бекметовтің үйінде, Құнанбай қажы сал­дырған мешітте және басқа да тарихи орындарда болып, құнды жәдігерлермен танысты. Сондай-ақ, олар Қарқаралыдағы Ұлттық табиғи паркте болып, ол жердегі аса сирек кездесетін аң-құстарды тамашалады. Екі күндік демалыс барысында журналистер қауымы естен кетпес әсер алып, шараны ұйым­дастырушыларға дән риза болып, табиғаты уылжыған Қарқаралыны қимай аттанды. «Алдағы уақытта да БАҚ өкіл­­дерін еліміздің өзге де өңір­ле­ріне демалыс сапарына апарып тұруды жоспарлаудамыз», – деді министрліктің PR кеңесшісі Май­раш Тайкенова. Қайрат ӘБІЛДИНОВ, «Егемен Қазақстан» Қарағанды облысы