Ел кәсіпкерлері үшін жеңілдіктер жасалмақ

Қазақстан Республикасы Премьер-Министрінің бірінші орынбасары Бақытжан Сағынтаев бейнеконференция байланысы режімінде өткен Еуразиялық экономикалық комиссия Кеңесінің (ЕЭК) отырысына қатысты, деп хабарлады Премьер-Министрдің баспасөз қызметі. Кеңес мүшелері тауар­лардың белгілі бір түрлеріне оларды енгізудегі кедендік баж салығы ставкаларының  төмендеуіне байланысты кедендік-тарифтік реттеу мәселелерін қарады. Осылайша, қазақстандық кә­сіп­орындардың өтініші бойынша 2016 жылдың 1 қыркүйегінен 2021 жылдың 31 тамызына дейін Қазақстан Республикасының аума­ғына енгізілетін титан тоты­ғын кедендік баж салығы­нан босату туралы шешім қа­былданды. Бұл шара өндіріс шығындарын азайтуға, сондай-ақ, отандық титан өнімдерін өндірушілердің бәсекеге қабілеттілігін арттыруға жағдай жасайды. Оның сыртында отырыс барысында электр қоз­ғалт­қыштары бар автомо­бильдер, сол сияқты отын ретінде табиғи газды пайдаланатын көлік құралдарының жекелеген жиынтықтары үшін оларды енгізудегі кедендік баж салықтарының ставкаларын тө­мен­дету жайы қолдау тапты. Қазақ­стан үшін бұл шаралар «жасыл» экономикаға көшу шеңберінде ба­сымдыққа ие болып табылады. ЕЭК Кеңесінің мү­ше­лері, сон­дай-ақ, Сыртқы эко­но­микалық қызмет жүйесінде «бір терезе» меха­низмін жүзеге асыру жөніндегі егжей-тегжей­лі іс-шаралар жос­парына қолдау көрсетті, оның өзі бизнес-үдерістерді оңтай­лан­дырудың тиімді құралы болып табылады және одан арғы жерде экспорттық-импорттық операциялар кезінде кәсіпкерлердің шығындарын төмендетуге жағдай жасайды.