Қазақстан тарихының жарқын беті

Жексенбі күні Алматыдағы Балуан Шолақ атындағы спорт сарайында 7-ші Қысқы Азия ой­ын­дары салтанатты түрде жабылды. Онда Елбасы Нұрсұлтан Әбішұлы Назарбаев сөз сөйледі. Құрметті меймандар! Қымбатты спортшылар! Қадірлі отандастар! Бүгін Астана мен Алматының арасын спорттық думанға бөле­ген 7-ші Қысқы Азия ойындары өз мәресіне жетті. Жарыс жеңімпаздары мен жүл­дегерлерді осы мерейлі сәтпен құттықтаймын! Әділдік пен шеберлік астас­қан дүбірлі дода нағыз мықты­ларды анықтап берді. Азиада барысында достықтың ізгі жалауы желбіреп, құрлық ел­дерінің әнұрандары шырқалды. Бұл спорт мерекесі тәуелсіз Қазақстан тари­хының жарқын беттеріне айналады деп сенемін. Азиаданы жоғары деңгейде өт­кізуге үлес қосқан барша ма­ман­дарға, спортшыларға ризашы­лығымды білдіремін. Байрақты бәсекеде Қазақстан намысын қорғаған спортшыларға да айрықша алғыс айтамын. Біздің атлеттеріміз жоғары же­тістіктеріне қол жеткізіп, ел тәуелсіздігінің 20 жылдығына тамаша тарту жасады. Астанада жағылған Азиада алау­ының жылуы әр жүректе ұзақ сақталады деп сенемін. Баршаңызға Қазақстанға деген ыстық ықылас­тарыңыз үшін шынайы алғысымды білдіремін. Келесі қысқы Азиаданы өт­кі­зу мәртебесі Жа­понияға беріліп отыр. Азия спортының жұлдызы жарқырай берсін! Қымбатты ойынға қатысу­шы­лар! Қымбатты қазақстандықтар, шетелдік қонақтар! 7-ші Қысқы Азия ойында­ры­ның соңғы күні тарихқа еніп бара жатыр! Олар халықаралық өмірдің ау­қымды оқиғала­рына айналды. Астана мен Алматының спорт алаңдарында жиырма жеті мемлекеттен келген үздік атлеттер әділ күресте бас қосты. Алғаш рет 69 медальдар жи­ын­тығы сарапқа са­лынды. Бұл – қысқы Азиада үшін рекорд. Командалық есепте біздің спортшылар тамаша нәтижелерге жеткеніне мен қуаныштымын. Қазақстан осындай жоғары деңгейдегі жарыс­тарды өткізуге қабілетті құрлықтық державалар қатарына қосылды. Азияда күштің, әдеміліктің және қайырым­ды­лықтың нағыз салтанатына айналды. Біз спорт мерекесін бейбітшілік пен дос­тықтың да мерекесіне айналдыра алдық. Осынау күндерде әр елден кел­ген мыңдаған адам бір-бірі­мен кездесіп, әңгімелесті, өзара білісті. Көптеген адамдар Қазақ­стан­да жаңа достар тапты. Біздің барлығымыз да, әр түрлі халықтардың өкілдері рухани тұрғыда байи түстік, жанымыз жомарттана түсті. Біз бір-бірімізді жақсырақ тани түстік. Азиаданың ең басты жетістігі деп шын мәнінде осыны айту керектігіне сенімдімін. Қымбатты достар! Қазір біз 7-ші Қысқы Азия ой­ындарымен риза­шылықпен қош­тасып отырмыз. Олар бізге керемет те ұмы­тылмас сәттер сыйлады. Бұл ерекше ойындар болды. Ашылуы Астанада, Азиада­ның ең солтүс­тіктегі елорда­сын­да өтті. Біздің қонақтарымыз әлемдегі ең биік таудағы мұз айдыны – «Медеуді» көрді. Біздің ойындарымызда алғаш рет Қазақ­станның 20 қаласын айналып өткен Олимпия­лық алау эстафетасы болды. Азияның Олимпиялық кеңесі эстафетаны жүйелі етуге шешім қабылдады. Азиаданың қайырымды сим­во­лы – біздің қазақстандық ба­рыс – жұрттың бәріне жақын әрі бірге туғандай болды. Барлықтарыңызды 7-ші Қыс­қы Азия ойында­рының аяқ­та­луы­мен құттықтаймын, мен сіздерге: «Жаңа кездесулерге дейін!» деймін. Қадірлі меймандар! Қымбатты отандастар! Осымен 7-ші Қысқы Азия ой­ындарын салтанат­ты түрде жа­бық деп жариялаймын!