Ақиық ақынға арналды

«Кең дүние, төсіңді аш мен келемін» деп күні кеше ғана 80-ге толған дара талант Мұқағали Мақатаевқа ар­налған кештер Отанымыздың барлық өңірлерінде өтіп жа­тыр. Сондай бір ән мен жырды әуелеткен басқосуға Арқа­н­ың ажары саналатын Көкшетау қаласында куә болдық. Оның ұйытқысы – Біржан сал атындағы музыка колледжі десек, ақынның жырларын оқып, сөзіне жа­зылған әндерді нақышына келтіре орындаған атал­мыш білім ұясының студенттері мен дарынды балалар мектеп-интернатының оқушылары еді. Бір ғажабы, ақынның шағын өлеңдерінен бастап, көлемді поэмаларына дейін сахна төрінде саң­қылд­ап тұрып жатқа оқыған жастардың жыр жампозына деген ерекше сүйіспеншілігін аңғарған­дай боласың. Әсіре­се, бірінші сынып оқушысы Әділет Қабыкен мен екінші сынып оқушысы Аружан Қабдөш­тердің он шу­маққа дейінгі өлеңдерді жаңылмай жатқа айтып шығуы тәнті етті. Арасында әнге кезек беріліп, бимен әспеттеліп отырды. Сұрапыл соғысқа аттанған әке мен баланың бейнесінен көрсетілген көріністегі жыр жол­дарының қимыл-қарекет­пен ұштасып келетін тұсы та­рихқа айналған жылдардың өшпес ізін көз алдыңа әкел­ген­дей болды. Белгілі сазгер Болат Есмұханов ақиық ақын­ның сөзіне жазылған «Жары­ғым-ай» атты әнін орындады. Кешке Астанадан арнайы барған ақынның ізбасар інісі Ерғожа Тілепбердиев жырдан шашу шашса, А­с­та­на­дағы Қалибек Қуанышбаев атындағы театрдың ре­жис­сері Қазақстанның еңбек сіңірген қайраткері Болат Ұзақов сахнада алғаш рет ақын бейнесін қалай сомда­ғаны туралы ойын ортаға салды. Одан кейін Ақмола облыс­тық музыкалы драма театрының әде­биет бөлімі­нің меңгерушісі, ақын Ерболат Баят жыр дүл­дінің екінші өлмес өмірі туралы толғауымен таныс­тырды. Ал колледж директоры Қайырлы Сәрсенбаев Біржан сал, Ақан сері елінің қашанда ұлт руха­ниятының айтулы тұлға­ларының айтулы күндерінен қалыс қалмай, өз үндерін қосып отыратынын, бұл жастарды отаншыл­дыққа баулуға, алдыңғы толқынды танып білуге, таланттарды бағалап, құрмет көрсетуге ерекше септігін тигізетінін атап өтіп, осындай жақсы істердің басы қасында жүретін, Мұқағалиға арналған осы кешті өткен жылдан бастап қолға алған, білім ордасы басшысының орынбасары Қуанышгүл Мағ­зұмова екендігін айта келіп, жастар тәрбиесімен айна­лысып жүрген әр азамат осындай игілікті шараны жү­зе­ге асырып отырса, бүгінгі оқушы ертеңгі еліміздің белді азаматтары болуға талпынып отырған жастар­дың ой-санасы биіктеп, елге деген ілтипаты мен сүйіспеншілігі арта береді, деді. Сүлеймен МӘМЕТ.