Ыстанбұлдың ықыласына бөленді

Қазақ ұлттық балет өнері бағына жұлдыздай жарқырап туған жеңімпаз баламыздың аты-жөні – Бақтияр Адамжан. Жақында «Астана Опера» мемлекеттік опера және балет театрының жетекші солисі Түркияның Ыстанбұл қаласында өткен Балет әртістерінің V халықаралық байқауында Бас жүлдені қанжығасына байлады. Қазақстан, Ресей, Австралия, Бразилия, Болгария, Жапония, Канада, Оңтүстік Африка, Оңтүстік Корея және басқа да бірқатар елдерден іріктелген қатысушылар Сюрей опералық театрында (Қадыкей ауданы, Ыстанбұл қаласы) бас қосқан болатын. Үш кезең бойынша өт­кізілген өнер сыны 13 шілдеге дейін жалғасты. Оған жастары 15 пен 26 аралығындағы жастар қатысты. Салтанатты Гала-концертте Бақтияр Адамжан мен ақтық сайысқа жолдама алған жеңімпаз жастар конкурс репертуарынан үздік нөмірлер ұсынды. Берлин Мемлекеттік балетінің көркемдік жетекшісі, «Токио-балеттің» шығармашылық жөнін­дегі кеңесшісі Владимир Малахов төрағалық еткен қазылар алқасы құрамында Р.Нуреев атындағы балет әртістерінің халықаралық кон­курсының директоры Р.Бокор, Скопье (Македония) Би театры және би фестивалінің директоры Р.Рисимкин, «Dance for You» журналының редакторы М.Виеру, Қазақстанның халық әртісі Г.Тұтқыбаева, Бостон балетінің көркемдік жетекшісі М.Ниссинен, Голландиялық би фестивалінің көркемдік жетек­шісі, Роттердамдағы Өнер уни­­верситетінің «Кодартс» би ака­де­мия­сының атқару кеңесінің мү­шесі С.Вюрстен және басқалар бар. Жетекші солист ыстанбұлдық сахнада Л.Минкустың «Дон Кихот», «Баядерка», Б.Асафьевтің «Париж жалыны», Ц.Пунидің «Эсмеральда» классикалық балеттерінен вариациялар орындады. Мұнымен қатар, Бақтияр арнайы екі заманауи нөмір – қазақстандық хореограф Сиязбек Уәлибековтің «Менің бөлігім» (Part of me) және Исян Чжанның (Бейжің қ., Қытай) «Ояну» (In the wake) туындысын ұсынды. Бақтияр Адамжанның билеге­нін алғаш көрген белгілі бейжіңдік хореограф Исян Чжан, әртістің болашағы зор және де қай жағынан болсын жоғары марапатқа лайық екенін атап өтті. – Нөмірдің алдында Бақтияр­дың стилі мен техникасын анықтау мақсатында билеп беруін өтіндім. Солистің дайындығы көңіл көн­шітеді, ол бәрін жылдам әрі лезде қағып алады, солай бола тұра алдағы уақытта әлі көп нәрсені үйренуі мүмкін. Онымен бірігіп жұмыс істей бастаған алғашқы сәттен-ақ өзгерісті байқадым – осы қысқа уақыт ішінде әртіс өзі үшін жаңа стильді меңгеріп, ай­тар­лықтай биікке көтерілді. Мен оның шеберлігі мен алған білімін паш етуге тырыстым, – дейді Исян Чжан. Өз кезегінде Бақтияр Адамжан дайындықтың алғашқы мезетінде-ақ жеңіске жетуге талпынғанын айтты. – Ыстанбұлдағы конкурсқа әлем­нің әр өңірінен үздік бишілер келді, сол себепті біз бір-бірімізден молынан тәжірибе алмасуға ты­рыстық. Түрік көрермені менің өнерімді ыстық ықыласпен қарсы алды. Заманауи хорео­графиядан кейін классикалық биге «ауысу» оңай болған жоқ. Шынын айт­қанда, бойымды тылсым бір күш би­леп алды. Жақында ұлым дүниеге келген болатын. Перзентімнің қуанышынан  әсерленіп, құсша шарықтаған шығармын. Жеңіс адамға бұрынғыдан да зор жауап­кершілік жүктейді. Ендеше, алдымда мұнан да биік асқаралы асулар тұр, – деді журналистермен ой бөліскен Бақтияр Адамжан. Тағы бір айта кететін жайт, конкурстық бағдарламаның төрт классикалық вариациясын дайындаумен «Астана Опера» балет­тік труппасының көркемдік же­текшісі, Ресейдің халық әртісі Алтынай Асылмұратова мен педагог-репетитор, Ресейдің еңбек сіңірген әртісі Константин Зак­линский айналысты. «Әртістер үшін халықаралық конкурстардың орны қашанда маңызды саналады, себебі, дайындық пен додаға қатысу өнердің өрісін өсіреді, дамытады, бұл, тіпті, төзімділікті тек­серумен тең. Жалпы, мұнда кон­курсқа арналған және кон­курсқа арналмаған әртіс дейтін ұғымдар бар, өйткені, мұндай ауыртпалықты көтеріп шығатын жандар некен-саяқ. Балеттің көп жағдайда спортпен ұқсас болуы содан. Балет сыны үздіксіз дайындықты талап етеді. Сол себепті жастық шақта оларға түрлі өнер бәйгелерінде бақтарын сынауға тура келіп жатады. Міне, сондай халықаралық додада Бақтияр Адамжан біздің үлкен балеттік әулетімізді жерге қа­рат­қан жоқ, лайықты деңгейде өнер көрсетті» – деп Алтынай Асылмұратова сапар туралы әңгімесін түйіндеді.  Қаршыға КҮЛЕН