Комбайн штурвалында – облыс әкімі

Биыл Орал өңірінде егін өте бітік шықты. Күздік бидайдың шығым­дылығы орташа есеппен алғанда 40 центнерден асып түседі. Соңғы рет қай жылы осындай рекордтық өнім жиналғанын батысқазақстандық астық өсірушілер естеріне түсіре алатын емес. Мұндай жағымды жайт аймақтың ең астықты ауданы Зеленовта болып отыр. Мұн­дағы «Матевосян» шаруа қожа­лығына қарасты егін орып жүрген америкалық «Джон-Дир» комбайндары теңіздей тербелген бидай сабақтарын баудай түсіріп барады. Осы көрініске куә болған облыс әкімі Алтай Көлгіновтің жүзі де тым жайдары көрінді. Көкжиекпен көмкерілген егін­дікке сүйсіне әрі риза болып тұрған облыс басшысы бір кезде алқапта жүр­гендерді таң-тамаша қалдырып жақындап келіп тоқтаған комбайн штурвалына барып отырды. Ол ең әуелі «Джон-Дирды» басқару өте ыңғайлы әрі қолайлы екеніне көзін жеткізді. Басқару кабинасы түгелдей әйнектелген, штурвал иесінің жан-жағын жіті бақылап отыруына толық мүмкіндік бар. Автоматтандырылған егін ору техникасында ауа баптағыш құрылғыға дейін ойластырылыпты. Облыс әкімі еш тайсалмастан оны жүргізу тетігін басқан кезде дала кемесі қаздай қалқып қозғала берді. Көп жүрмей-ақ жүздеген метр алға озған кезде оның бункері баданадай алтын дәнге толды да қалды. Осылайша өңір басшысы биылғы жылы қамбаға құйылатын құт-береке мен ырысқа өз қолымен орылған 48 центнер бидайды қосты. Осындайда техника тілін білу еш уақытта артықтық етпейтініне көзім одан әрі жете түскендей күй кешеді екенсің. Әрі техника болғанда қандай?!  Заманауи, ең соңғы үлгідегі алым­ды да, шалымды комбайн. Сірә, мұны облыс әкімінің көпшілікке көрсеткен тағы бір өнегесі десек жарасар. Темір ҚҰСАЙЫН, «Егемен Қазақстан» Батыс Қазақстан облысы, Зеленов ауданы