Өнеркәсіптік әлеует сұранысты тудырады

Көкшетауда жұма күнінің кешінде өткен «Ақмола облысының өнеркәсіптік әлеуеті» форумы көп жиналыстарға қарағанда, ерекшелігімен көзге түсті. Мұндағы бас­ты артықшылық еркін пікір ауанында ортақ түйін жасалып, нақты істерге жол басталуында дер едік. Билік пен кәсіпкерлік элитаның ел мүддесіндегі әріптестігі де шынайы көрініс тапқанын бөлектеп айтқан жөн. Нәтижеден бастайық. Форум­да облыс әкімі Сергей Кулагин «KB ENTERPRISES» ЖШС бас ди­ректоры Тайлан Караманлимен күн электр стансасы, жылыжай­лар, қоян өсіру фабрикасы, ба­лық шаруашылығын дамыту құ­ры­лыстары (инвестицияның жалпы салымы 677 миллиард теңге), «Қазақалтын» тау-кен ме­таллургиялық концерні­нің бас директоры Евгений Бала­шов­пен техногендік минералды құрылымдарды қайта өңдеу жөніндегі жаңа фабрика­лар құрылысы (27,5 млрд. теңге), «Bavaria Product АӨҚ» құ­рыл­тайшысы Хенрик Войгтпен 2050 бас шошқа өсіру кешені мен қай­та өңдеу кәсіпорнын салу (7,7 млрд. теңге) туралы меморандумға қол қойды. Бұл мәміле жасалған 10 меморандумның үшеуі ғана. Айта кететін бір жағдай, осы 10 аса ірі компанияның басшылары форумда өз кәсіпорындары туралы жобалық таныстырылымдар тұр­ғысында сөз сөйлегендігі. Облыстың өнеркәсіптік әле­уеті жергілікті билік өкілдерін де іскерлік қозғалысқа түсіріп отыр. Жақсы мысал ретінде тағы да меморандумдарға жүгінейік. Форумның салтанатты мінберінде Көкшетау қаласының әкімі Ер­мек Маржықпаев пен «Есіл» әлеуметтік кәсіпкерлік корпора­циясы» ұлттық компаниясы» АҚ бас­қармасының төраға­сы Амантай Сейфуллин облыс орталығында индустриялық ай­мақ құру, Степногор қаласының әкімі Әнуар Күмпекеев пен «Astana NAN» серіктестігінің директоры Борис Цоктоев агрохимиялық клас­тер түзу, Жарқайың ауда­ны­ның әкімі Асқарбек Үйсімбаев пен «Масаль ТБК» ЖШС бас ди­ректорының міндетін атқарушы Марат Ермеков 274,3 миллиард тең­геге бағаланған «Масаль кенішінен темір рудасын өндіру және өңдеу» инвестициялық жобасын жүзеге асыру, Целиноград ауданының әкімі Малғаждар Тәт­кеев пен «EQS Еуропалық са­­па­лық сервис» серіктестігінің директоры Шахим Насибов 100 миллион АҚШ доллары кө­леміндегі трактор зауытының құ­рылысын жүргізу жөніндегі өзара ынтымақтастық құжатына қол қойды. Жалпы, Көкшетау меморандумының жиынтық қоры 1,2 триллион теңгені құрап отыр. Аталған мысалдардың өзі Ақ­мола облысының өнеркәсіптік әле­уетінің жоғарылығын ғана емес, Қазақстанның индустриялық және ин­вестициялық саясаты­ның сарабдалдығын айғақтайды. Со­нымен бір мезетте, астана­лық өңір­дің мұндай серпінді қадам­ға нақты негіз қалай білгені кө­ңіл өсі­реді. Бұған облыс әкімі­нің баян­­­­да­масына сілтеме шолуымыз дәлел болатындай. – Индустрияландыру мен эко­­­номикалық өсім Қазақстан Рес­пуб­ликасы Президентінің «100 нақты қадам» Ұлт Жоспарының негізгі тұтқасы, – деді С.Кулагин. – Индустрияландырудың қазір­гі заманғы тетіктерін пайдаланбай бәсекеге қабілетті эконо­ми­ка мен әлеуметтік мемлекет құру мүмкін емес. Мем­ле­кет басшысы белгілеген инс­ти­туттық реформаның негізгі бағыттарын орындау барысында Ақмола өңірінде өнеркәсіптің басымдық берілген секторында стратегиялық инвесторлар тарту, экспорттық әлеуетті ұлғайту, жоғары технологиялық жобаларды жүзеге асыруға бағытталған мақсатты жұмыстар жүргізілуде. Облыс республикамыздағы теміржол подщипниктерінің 100 пайызын, жүк автокөліктерінің – 40, жоғары сапалы бидайдың, алтын мен керамикалық кірпіштің әрқайсысының 30 пайызын өн­діреді. Басқа да салалар бойынша жетекші орын қамтамасыз етіл­ген. Облыста экспортқа ба­ғыт­талған 17 жоба іске асырылды. Уақыт ағымындағы өзгеріс облысты аграрлық-индустриялық өңірге айналдыруымен құнды. Облыс әкімі мұны төмендегідей цифрлармен негіздеді. Аймақтың индустрияландыру картасына 671 миллиард теңгенің 107 жобасы енгізілген. Бұның 62-сі жү­­зеге асырылып, 6300 жаңа жұ­мыс орны құрылыпты. Кәсіп­орын­дарды толық қуатына қосу белгіленген кесте талабында ба­қы­лауда ұсталып отыр. Қазіргі күні өнеркәсіп өнімінің 36 пайы­зы жаңадан қатарға қосылған кә­сіпорындардың үлесінде және бұлардан бюджетке 17 миллиард теңге қаржы түскен. Облыс­тың был­тырғы жыл мен биылғы жар­­ты­­­жыл­дықта өнеркәсіп өнімі өндірісінің рейтингінде ал­дыңғы орыннан көрінуінде аталған кәсіпорындардың үлесі баршылық. Сондай-ақ, жұмыс іс­теп тұрған кәсіпорындардың жүк­­темесін азайтпауға жете көңіл бөлінуде. Облыста агроөнеркәсіп ке­шені орасан зор мүмкіндікке ие. Қор­ғалжын ауданындағы «Астана-Агропродукт» кәсіпорнының ет өнімдері Мәскеу қаласының супермаркеттерінде сатылуда. Ал Еңбекшілдер ауданындағы «КазБиф» ЖШС ірі қара еті Санкт-Петербург қаласына, Свердлов, Ленинград, Челябі облыстарына, Краснодар өлкесіне, Қытайға шығарыла бастады. Сүт өндіру кәсіпорындарының «Садовое», «Одари», «Зорькин луг» сауда маркасы Ресеймен ше­к­аралас өңірлерге кеңінен таныс. «ҚазгерҚұс» компания­сы өндірістік жүйенің екінші кезеңін іске қосу нәтижесінде Орталық Азия мен Таяу Шығысқа жұмыртқа жеткізуге мүмкіндік алмақ. Әлемде орын алып отырған дағдарысты жағдайларды ес­кер­меуге болмайды. Қазір қа­зақ­стандық ЭКСПО-2017 ха­лық­аралық көрмесінің басты тақырыбына айналған балама­лы қуат көздерін игеруге жаппай ба­сымдық берілуде. Мұнда да іргелі ізденістер бар. Форумға қатысушылардың сөздерінен Ат­басар ауданында 41,7 миллиард теңгенің күн электр стансасы құ­рылысының жобасы, Аршалы ауданында 99,9 миллиард теңге­нің 100 МВт қуаттағы жел паркі, Целиноград ауданында «KB Enterprises» серіктестігінің 55,8 миллиард теңгелік күн электр стан­сасының құрылысы қолға алынатынын білдік. Форумда кадр мәселесі арнайы сөз болғаны құптарлық. Үс­тіміздегі жылы дуалды негізде кәсіби білім берумен 38 колледж айналысуда. Онда 21 мыңнан астам оқушы 94 мамандық бойынша білім алып жатыр. Бұл – өлке тынысын кеңейтуге бағытталған игі қадам. Бақберген АМАЛБЕК, «Егемен Қазақстан» Ақмола облысы