Люкс киіз үй

АҚШ-та бұрын-соңды болмаған қонақүй ашылды. Манхэттен орталығында люкс санатындағы киіз үй бой көтерді.   Атына сәйкес, мамандар оны Орталық Азия халықтарының дәстүрі бойынша дайындаған екен. Киіз үй қала халқы көп шоғырланған жерде орналасқан. Дыбыс өткізбейтін құрылғылар орнатылғандықтан, көшедегі шу келген қонақтарға еш кедергі келтірмейді. Мұнымен қоса, дизайнерлер көшпелі халықтың тұрмысын сезініп білуі үшін арнайы алаңқай жасаған. Бұл жерде келушілер от жағып, кемпинг ұйымдастыра алады. Жаңа стильдегі мейман­хана­ның ішіне шағын диван орналас­тырып, еденіне көрпелер төсепті. Мәліметтер бойынша, қонақүй қа­раша айына дейін жұмыс іс­тейді. The Daily Mail басылымының ақпары бойынша, жоба авторлары көшпелілер үйін Калифорнияда өткен Коачелла музыкалық фести­валінен көрген екен. Осыдан барып қонақүй жасау туралы ой келіпті. Сонымен қатар, сыртқы пішінінің жұмыр болуына да баса назар аударған болса керек. Себебі, мұндай бөлме адамдардың бір-бірімен еркін әңгімелесуіне ыңғайлы екенін айтты. Бүгінде Нью-Йорк тұрғын­дарының жаңа нысанға деген қызығушылықтары артуда. Бір рет түнеп шығу құны да арзан емес, 2-3 мың долларды құрайды. Бұл элиталық қонақүйлерден әл­­деқайда қымбат. Шарықтап тұр­ған бағасына қарамастан, келушілер  қарасы азаяр емес. Аян ӘБДУӘЛИ, «Егемен Қазақстан»