Теледидарға телміру қатерлі

Теледидардың алдында көп отыру адамның денсаулығына айтарлықтай зиян келтіріп, өмірін қыс­қартады. Жиырма жылды қамтыған зерттеу нәти­жесін­де жапон ғалымдары осындай қорытынды жасады. Ғалымдар алдымен 40-80 жас аралығындағы адамдардан күн сайын неше сағат теледидар көретіндерін сұрастырыпты. Арада жиырма жыл өткенде сауалдамаға қатысқан адамдардың ішінде күн сайын бірнеше сағат уақыт теледидар көргендері ертерек қайтыс болып кеткені анықталған. Олардың көпшілігінің өліміне өкпе артерияларының бітеліп қалуы себеп болған екен. Зерттеушілердің айтуынша, теледидарға телміріп қозғалыссыз отырған кезде адамның аяғы қозғалысқа түспегендіктен, қан айналымы баяулайды. Соның салдарынан қантамырларда ұйыған түйіршіктер пайда болады. Ұйыған түйіршіктер бірінші кезекте өкпе артерияларын бітеп тастап, адамның өміріне қауіп төндіреді екен. Айбын АҚПАТША