Қазақстан боксшылары Рио-де-Жанейроға келді

Қазақстанның бокстан олимпиялық құрамасы кеше түнде Рио-де-Жанейороға аман-есен жетті. «Хабар» телеарнасы тілшісінің хабарлауынша, спортшылардың бәрі Бразилия жеріне жеткен бойда олимпиялық қалашыққа орналасқан. Олимпиадағы боксшылар турнирі 6 тамызда басталып, Ойындар жабылғанға дейін созылады. Еске сала кетейік, Қазақстанның ерлер құрамасы бұл жолы Олимпиадаға алғаш рет 10 салмақ бойынша жарысқа өкілін қойып, толық құрамымен қатысқалы отыр. Бұл құрамда Біржан Жақыпов (49 кг), Олжас Сәттібаев (51 кг), Қайрат Ерәлиев (56 кг), Берік Әбдірахманов (60 кг), Абылайхан Жүсіпов (64 кг), Данияр Елеусінов (69 кг), Жәнібек Әлімханұлы (75 кг), Әділбек Ниязымбетов (81 кг), Василий Левит (91 кг) және Иван Дычко (+91) бар. Осы жолы Біржан үшінші мәрте Олимпиадаға қатысқалы тұр. Ал Данияр Елеусінов, Әділбек Ниязымбетов және Иван Дычко үшін бұл екінші Ойындар болмақ. Мұның алдында, 2012 жылы Лондонда Әділбек – күміс, Иван қола медаль жеңіп алған. Әйелдер боксында турнирде үш салмақ бойынша медальдар сарапқа түседі. Соның екі салмағында қазақстандықтар Жайна Шекербекова (51 кг) мен Дариға Шәкімова (75 кг) сайысқа қатысады. Ал 64 кг салмақта біздің боксшымыз Зарина Цолоева лицензия ала алмады. «Хабар» телеарнасы қазақстандық спортшылардың қатысуларымен өтетін барлық спорт жарыстарынан тікелей эфирде хабар беріп тұрады. Дамир ҚОЖАМҚҰЛ